Vanlawng Kahnak He CDM Nan Tuah Ahcun Laksawng Phaisa Kan In Pek Hna Lai – NUG National Unity Government(NUG), runvennak zung nih Vanlawng thlak khawhnak hriamnam he CDM nan tuah ahcun laksawng phaisa kan pek hna lai tiah cathanh a chuah. SAC ralkap nih vanlawng in PDF le tualchung mi a kah lengmang hna caah Vanlawng thlak khawhnak hriamnam he mizapi sinah nan i fonh ahcun lak sawng phaisa kan in pek hna lai, tiah runvennak zung nih an langhter.

Ramchung kahdohnak, a bik in Sagaing ramṭhen Magway ramṭhen Karen ramkulh Chin ramkulh le Karenni ramkulh ah vanlawng in SAC ralkap nih a kah hna caah tualchung mi a thimi le inn le lo a rawkmi a tam cang. A luancia thla ah vanlawng i khamnak motor(Armour) le a dang raltuknak thilri he CDM nan tuah ahcun laksawng phaisa kan pek hna lai, tiah NUG nih a rak thanh ahkhan pehtlaihnak a kan tuahtu an um, tiah runvennak zung in chungtel Naing Htu Aung nih a chim. Nawlngeihnak lak hnuin SAC ralkap le palik CDM a tuahmi hi thong hra leng an phan cang tiah theih a si.

Thawngdang Sagaing Le Magway Ramṭhen Ah SAC Ralkap 38 An Thi. Sagaing le Magway ramṭhen ah rallam a sialmi SAC ralkap pawl cu nizan August 5 ah PDF nih an kah hna caah ralkap 38 hrawng an thi tiah PDF nih an thanh. Kalay Peng Ah SAC Ralkap 20 An Thi. Nizan August 5 zing sml 9:30 hrawng ah Kalay Tahan in Taungphilar zung rianṭuan umnak inn lei ah a kalmi SAC ralkap motor 2 cu PDF -Kalay hmanhmi bomb nih a puahhnawh hna caah ralkap 6 cu a hmun ah an thi colh. Adang ralkap 4 cu sii-inn an kalpi hna lioah an thi tiah theih asi. Kalay peng thlang lei Myaing tiva hlei lei kap in a rami SAC ralkap 30 hrawng cu hlei pawng ah PDF nih bomb an puahhnawh hna i, ralkap 10 hrawng an thi 10 nak tlawm lo hliamhma fak an pu tiah theih a si.

Htichaik Ah SAC Ralkap 4 An thi: Sagaing ramṭhen Htichaik khua pumpululh certual pawng a phanmi SAC ralkap pawl cu nizan August 5 ni zing sml 11:20 hrawng ah PDF nih bomb an puahhnawh hna caah ralkap 2 an thi, tiah Tigyaing Revolution -TR sinin theih a si. Ausgust 5 ni zanlei sml 5:15 ah Htichaik lamtonnak ah mi a chektu SAC ralkap le palik cu motor pakhat le cycle phanih in an kir lei ah bomb kan puah tak ṭhan hna i palik 2 an thi, 2 hliamhma an pu, tiah Htichaik PDF nih cathanh an chuah.

Pale Ah SAC Ralkap 5 An Thi: August 4 zing sml 7:30 hrawng ah Pale peng Inmahti khua in Mintaingpin khua lei ah a kalmi SAC ralkap pawl cu M.R.D.A phu nih bomb kan puahhnawh hna caah ralkap 5 an thi cathanh an chuah. Taze Ah Pyusawhti 6 An Thi Sagaing ramṭhen Taze peng Kabe khua in humhimnak lak ding ah a kalmi Pyusawhti pawl cu PDF nih bomb an puahhnawh hna caah Pyusawhti 5 an thi. Taze peng Chaungson khua Pyusawhti hruaitu a inn cu PDF nih sniper in an kah i Pyusawhti 1 a thi tiah theih asi. Ayardaw Bomb Puahnak Ah SAC Ral kap 2 An Thi Sagaing ramṭhen, Ayardaw khua in Monywa lei ah a kalmi SAC ralkap motor cu Kyawkar le Yenanpho khua karah nizan August 5 chunhnu sml 1:00 hrawng ah bomb puahhnawh an tong i, ralkap 2 an thi tiah theih asi.