Politico nih an thanhning in cacawn ninga (tuchun) thok in Treasury Department hna nih dollars million tampi cu bank in mipi sin ah phawtzamh a si cang lai. Hi bank in phaisa phawt tik ah hin bank a ngeitu sin a phanh le phanhlo rak hlathlai le zoh cio ding in mipi sin ah an thanh. Cacawn nikhatni thok khin Internal Revenue Service (IRS) hna nih hi phaisa i phawtnak kong ah hin pehtlai in rian an ttuan lai tiah mipi sin ah theihternak an tuah cang.

Hi bank in phaisa phawt dingmi hi $1,200 cio a si lai i cacawn nithumni tiang ah khin mipi pumpaak cio bank ah lut kho dih ding in timhtuah a si. IRS hna nih cacawn nithumni tiang ah mipi an mah le an bank cio ah a phanh le phanhlo zong tthate in an check lai. Tax returns ding in tuah (fill) lio ah thawng zei hmanh thanh rih lomi hna zong nih hmaithla chung ah cun hmuh khawh ding in tawlrel a si.

Politico nih tuchun cacawn ningani ah an chim chihmi cu IRS hna nih online application “Get My Payment” timi zong in 2018 le 2019 lio ah tax a rak pe cangmi hna nih cun tuah khawh ding in an thanh. Hi online application “Get My Payment” timi ah hin direct in phaisa zong kuat (transfer) colh khawh an si lai tiah an chim chih.

An tuakning ah cun American mipi 100 million hrawng nih hin direct deposit an ngei loh ti a si. Cu caah 5 million check cu zarh 20 chung ah mail in kuat dih ding in timhtuah a si tiah Politico lei nih an chim chih. Check in i phawtzamh hi a ra laimi May thla zarhkhatnak in kan thok khawh te lai tiah kan ruah ko tiah an chim chih. Washington Post nih an thanhning in American mipi zeimawzat cu September thla tiang ah khan kutro in a ummi an um tiah an chim.

Hi bantuk in mail hmang in paper check in kuat zong ah American mipi chung ah hin mah pumpaak min in bank account (checking account) a ngei lomi tampi an um rih. Cu caah mi tampi nih cun harnak an ton khawh rihmi a si tiah an chim.

President Trump nih kan hnu thla ah The CAREA Act i min a thut ning ah cun $75,000 in a tanglei a hlawhmi hna nih a voikhatnak ah hin $1,200 cio an hmuh lai ti a si. Cun nuva ning in $150,000 in a tanglei a hlawhmi hna nih $2,400 an hmuh lai i cu pin ah an fa le minung pakhat ah $500 cio chap an si rih lai ti a si. Chirchan: Daily mail