Breaking News: Uknak Laak Hnu In NLD Party Zung Pawl Cu Voi 100 Leng Doh An Tong! Uknak Laak Hnu In NLD Party Zung Pawl Cu Voi 100 Leng Doh An Tong! SAC nih uknak an laak hnu in ram pumpi ah ummi NLD zung pawl cu July 1 tiang ah voi 106 tiang doh le hrawh piak an tong tiah NLD party nih July 5 ah an thanh. Party zung pawl an doh le an hrawh mi lakah sang, khua, peng, ramkulh le ramthen zung lengah central zung zong aa tel, tiah NLD lei nih an langhter.

NLD zung hrawh mi hna lakah Sagaing ramṭhen cu a tam bik a si. Yangon Sagaing Tanintharyi Pago Mandalay Magwe le Mon ah zung tam bik cu hrawhpiak an si tiah San Chaung peng NLD party hruaitu nih a chim. Party zung an hrawhpiak hna caan cu mi choklet an tlawm lio caan ah a si, tiah NLD lei nih an chim.

Party zung hrawh a si pinah MP palai 119 le Party chungtel minung 224 hna i an innlo zong hrenhpiak le laakpiak an si, tiah an cathanh ah cun an langhter. Atu zong ah NLD party nawlngeitu theihpinak tel lo in zung chung luh an i tim i, cucu kan kan duh lo, an luh ahcun phung ning tein hmalaknak kan tuah lai, tiah an chim fawn.

Yangon i NLD central zung cu 2021 February, March le June thla ahkhan luhhnawh an rak tong i, bomb le a puak khomi hriam in an rak cheh hna. Cu kong he pehtlai in taza a cuaitu central committee chungtel U Ba Myo Thein le U Soe Laycu phungrelnak 17 1 in thong thlak an si. Yangon Ah USDP Party Chungtel Nu 2 Kahthah An Tong!

Nizan July 4 ah Yangon Hledan dawr pawng i meithal kah a tongmi nu pahnih cu an pahnih in an thi cang, tiah USDP party chimphuannak nawlngeitu Dr. Nanda Hlah Myint nih July 5 ah a chim. Meithal kah a tongmi nu 2 hi Hledan dawr ah thingthei a zuarmi USDP party chungtel an si. SAC ralkap sin i thawng an pek tawn caah aho si hngalh lo mi hriamtlai phu nih meithal in an kah hna, tiah Dr. Nanda Hlah Myint nih a chim.

SAC ralkap nih nawlngeihnak an laak hnu ah USDP party chungtel minung 1700 hrawng cu SAC ralkap sin thawngpetu ah puh in thah an tong cang, tiah USDP party lei nih an thanh. AAPP nih July 4 cathanh a chuahning ah SAC ralkap nih uknak an laak khumkhat leng chung ah SAC ralkap uk duh lo in cawlcanghnak a tuahtu minung 2057 thah an si cang i, minung 14,458 tlaihkhih an tong, tiah an langhter.

SAC Ralkap nih YeSinMah Khuami Fahnih ngei Nu Pakhat An Tlaihhrem Hnu In An Thah Beh. Gangaw peng YeSinMah khua ah SAC ralkap nih fahnih ngei nu cu a bu in an tlaihhrem hnu ah Ngakchia pahinh tel in khuami 7 an thah hna tiah khuami hna sin in theih asi. Pyo Saw Htee tel in thazaang 200 hrawng SAC ralkap hna rallam cu nizan July 4 ah Gangaw peng chaklei um khuate inn 600 leng asi mi YeSin ah an lut. Khuami cheukhat hna cu an tlaih hna i an thah hna.

Kum 22 a si mi fahnih ngei Pi Sandar Oo cu nizan ah an tlaih i an phu ning in an tlaihhrem hnu ah a fa le pahnih he an thah hna tiah khuami hna nih an chim. Kumkhat le cheu le kum 5 lawng a si rih i a fa le pahnih zong SAC ralkap nih an thah hna tiah khuami hna sin in theih asi. Cu nufa rual an konglam cu khuami hna zong nih zingka lawng ah kan theih tiah an chim. Thahnawn tong ve mi ngakchia hna 2 cu an tlaih hrem hna maw? hna lo ti theihnak caah mizapi vengti ralkap hna nih an hlat liopi si tiah theih asi.

Thawngdang Sac Ralkap Nih An Tuah Mi Thil Konglam Ah CNDF Nih Cathanh Chuah. Chin ramkulh, Falam peng le Sagaing ramṭhen Kalay peng ah May le June thla chung ah CNDF le SAC ralkap kahdohnak voi 11 a chuak i, SAC ralkap 66 an thi tiah CNO/CNDF nih July 4 ah cathanh an chuah.

Thla hnih chung kahdohnak ah CNDF ralkap 3 an thi i, 4 hliamhma an pu, tiah an langhter. SAC ralkap pawl nih Falam peng Ramthlo khua inn 10, Tlangzar khua inn 17, Parte khua inn 6 le Zawnglei khua inn 5 an khangh tiah an cathanh ah an langhter. SAC ralkap nih July thla zarhkhatnak ah Sagaing ramṭhen le Chin ramkulh ah thazaang tam tuk in rallam an sial i, hriamngan in an kah pinah Vanlawng in bomb tampi an thlak tiah CNO/CNDF nih an langhter.

Thawngdang Thin Zar Wint Kyaw Ruah Lo Piin Hi Ti Hin Avan Chuak. Kawlram Model Thin Zar Wint Kyaw cu SSPP Hriamtlai phu Thit umnak puai ah a kal Thin Zar Wint Kyaw hi Zei Uniform dah aa Hruk. Mawhchiat ding a si maw? timi ruahnak a van chuak. Aa hrukmi hna uniform hi Ralhrang uniform cu a si lo. Catial a dihlak na rel hnu ah bia khiahnak na tuah te lai.

Myanmar ram chungah sexy model a simi Thin Zar Wint Kyaw cu Shan ram hriamtlai SSPP/SSA (Shan State Progressive Party/Shan State Army) uniform bak he tthitumhnak puai ah a kal nak hmuh a si. Hi puai hi SSPP an ralbawi Colonel Major San Suh fanu puai a si tiah theih a si. A tulio a darling pa zong Thin Zar he hmunkhat ah an kal tti.Kan ram hriamtlai dothlennak hi phu 3 in then khawh asi.

Group-(1) Miphun luatnak ca lawngbak a kalpitu phu pawl— Rakhine(AA), Mon (MNSP) le Shanram phu pawl a simi UWSA, NDAA, RCSS, SSPP/SSA, TNLA le PNLO pawl an si. Annih cu Khuapau Dothlennak zong an bawm tuk lem lo i AA le TNLA dahtilo adang poh cu SAC he zong bia an iruah huar. Group-(2) Ralhrang (SAC/MAH uknak) uknak hrawh aa hmaithlakmi phu NUG le PDF pawl. Tlangcung hmun ah dirhmi local defense forces cheukhat zong hika group ah telh khawh an si len lai– CDF cheukhat zong.

Group-(3) Miphun luatnak ihmaithlak pah in Khuapau Dothlennak dirkamh i Ralhrang Uknak a do chihmi (a kemh chihmi) phu pawl Kachin (KIA) Karen(KNU), Chin (CNF), Karenni(KNPP) le Kukang (MNDAA). Chin (CJDC/CDF) le Karenni(KNDF) tepawl hi group-3 ah chiah awk ah aa rem nain cheukhat CDF pawl cu group-2 ah chiah awkin an um ve.

Ralhrang doh(Khuapau Dothlennak) hi cu kan tei zong teilo zongah short term thil a si. Kum tampi kalpi dingmi asilo. Kum hnihkhat ah ai lim a hau. Miphun dothlennak belte cu a herh cun miphun a hmunh chung kalpi dingmi a si. Cucu CNF le cheukhat CDF an idannak zong a si fawn. Source: Salai Ceu Bik Thawng