Breaking News: Uknak Ṭah Lo Donghter Ding In Ṭanrualpi Awktlak Phu He Lawng Rian Kan Ṭuanṭi Lai – KIO Chairman

Myanmar News

Breaking News: Uknak Ṭah Lo Donghter Ding In Ṭanrualpi Awktlak Phu He Lawng Rian Kan Ṭuanṭi Lai – KIO Chairman. Nizan August 10, Kachin Independence Organisation(KIO) Central zung umnak Laiza khua ah tuahmi a kum 47 nak Kachin Martyr Ni ah atu hi KIO Chairman General Imban La biacah cu Vice Chairman General Gun Dang Gum Shao nih a relpiak tiah theih asi. SAC ralkap nih remh daih tonbiaruah nak a kan auhmi hi an thluak a si i, lih le hrokhrawl lawngte asi. A hlan lio an thluak an hman ṭhan.

Remdaihnak ser in harnak le buainak vialte hi a phi kan kawl lai an rak timi hi aho hmanh nih an zum ti hna lo tiah KIO Chairman nih cun mizapi bia a cah hna. Myanmar ram laifang hmunhma hna ah kahdohnak a chuah lengmang tikah kum dang nakin chawlehthalnak a ṭum ei din a har chin lengmang. A ra laimi 2023 ah cun ei din a har chinchin khomi a si caah facang le a dangdang eidin tete nan cin cio lai. Eidin ti rawl zong semrel deuh in nan din nan ei lai, tiah forhfialnak a tuah. Miphun tam deuh uknak le hramhram uknak donghter ding ah ṭanrual pi awk a simi phu he rian kan ṭuanṭi lai, tiah KIO General Imban La nih a ṭial.

Thawngdang Chin Ramkulh, dohthlennak a tuahtu hriamtlai phu pakhat asi mi Zomi Federal Union (PDF-Zoland) nih hlawhtling tein raltuk nak Drone kan ser tiah August 9 ah khan an thanh. A rihzan 12kg in 15kg tiang a phur kho mi a si i, budget a tlawm ruang le battery lei tlam tlin lo ruang ah meng 9 tiang a zuang kho tiah PDF Zoland in chimphuannak nawlngeitu pakhat nih a chim.

Drone sernak ah phaisa a dihmi cu Drone a hmetngan cung ah aa hngat. A cawk in cawk ah cun 15kg a phurkhomi hi Ks. sing 90 in sing 100 kar a dih tawn nain kanmah tein kan ser caah sing 20 lawng kan dih, tiah PDF Zoland in ralkap pakhat nih a chim. ZFU/ PDF Zoland hna nih Engineering & Innovation in Mi ngiathlainak Drone Raltuknak Drone le Thilphurhnak Drone tiin phunthum an serchuah cang i, atu hi ral hriam tlaitu dang sin zong ah bawmhnak an pek cang hna tiah theih asi.

Meng 100, 400 le 500 tiang a zuang i a rak kir ṭhan khomi zong kan serthiam ko nain budget lei kan tlamtlin rih lo ruangah atu bantuk in kan budget he aa tlakning in meng 9 tiang a zuang kho mi lawng kan serchuah rih tiah PDF Zoland in chimphuannak nawlngeitu nih cun a chim chap.

Leave a Reply