UK scientist nih hneksaknak tha tein an tuah hnu ah dexamethasone sii cu Covid-19 mizaw a damter tiah an fehter. Mah sii hi cuap zawtnak a ngeimi, TB a ngeimi le thluak a phingmi hna nih an din tawnmi a si. Vawleicung hmunkip ah a ngahmi a si, a man zong a fawi i caan tawi te ah tampi chuah khawhmi zong a si. Vawleipi caah thawngtha ngaingai a si. Mah sii a dingmi cu 100% an dam dih tinak cu a si lo.

Kherhhlainak an tuahmi result ning in cun ventilator in thaw pekmi mizaw(a zual takmi) lakah dexamethasone sii a ding lomi hna lakah thihnak rate 40% a si, nain mah sii a dingmi mizaw hna lakah cun thihnak rate 28% lawng a si. A zual tukmi mizaw lakah dexamethasone rian a tuan khun. A zual lem lomi caah cun rian a tuannak a lang lem lo ti a si. Tuan deuh tein dexamethasone a rian tuan khawhnak rak theihcia sisehlaw UK ah Covid-19 mithi 5,000 cu kan khamh khawh hna lai tiah UK scientist nih an ti.

Tuni tiang ah scientist nih fehtermi Covid-19 thlopnak sii a um rih lo. Ebola sii remdesivir cu Covid-19 mizaw khulrang deuh in a damter tiah an chim nain thihnak rate(mortality rate) a tumter maw timi an theih kho rih lo. Cuhlei ah, remdesivir cu ram rum cheukhat lawng ah a ngahmi sii man fak a si.

Caṭialtu: Salai Lungthli Tum