Breaking News: Thantlang peng Zephai khua nih CNA/F le CDF caah $ Tam Taktak Abawmh Than Hna. Thantlang peng Zephai khua nih CNA/F le CDF caah $ singthum ( 300,000) an pekchanh tiah theih si. Lungrual cu tthawnnak le teinak hram pi asi. Zephai khua Bawipa nih ram le miphun caah hmangchin ko hna seh. Mah vial hi thawng kan theih mi cu asi i adang thawngpang aum cun kan thanh than lai.

Thawngdang relchih Nihin August 2 zaanlei ah Hakha khuachung hmun hnih ah CDF-Hakha nih SAC ralhrang pawl an kah hna tiah thawng pang kan theih. Zaanlei sml. 3:20 hrawng ah Vom Tu Maung cerhtual pawng i SAC palik sakhaan cu CDF-Hakha nih an kah hna i minute 5 chung hrawng kap hnih i kahnak a chuak.

Khuami pakhat nih “SAC ralhrang pawl nih an kahmi hna i kan naule ralkap hmu loin kah thlorh in an kahmi a lo. Mi umnak inn lei ah pei an rak kah ko cu. Inn cheukhat zong an khen i a rawkralmi a um pah” tiah a chim. Palik sakhaan kah an ton hnu minute tlawmpalte a rauh ah Hakhathar lomton (6-Lansone) ah hmun a khuarmi SAC ralhrang pawl cu CDF-Hakha nih pehzul in an kah hna.

Nihin zaanlei Hakha khuachung kahdohnak ah CDF-Hakha lei in hliampu le a nunnak a liammi an um lo. SAC ralhrang lei belte an sining theih a si lo. Hakha-Thantlang karlak Timit lei zong ah SAC ralhrang nih thazaang tampi in kan miphun ralkap pawl an kal hnawh hna i nihin zong ah kahdohnak a chuak. Credit: The Chin Journal

Nihin thawngpang dang: Kachin Ramkulh, Waimaw Peng SAC Ralkap Sakhan Pakhat Cu KIA Nih An Lak!: Kachin ramkulh, Waimaw peng Inwamyan SAC ralkap sakhan pakhat cu kan kah i, kan khanghtak tiah KIA nih an thanh. Nihin August 2 zinglei ah SAC ralkap kuttang um pyi-tuh-sit le SAC ralkap phufonh an umnak sakhan cu KIA nih an kah hna, tiah tualchung media nih an langhter.

KIA brigade 5 battalion 3 hmunram Inwamyan khua pawng i SAC ralkap sakhan cu KIA nih kan kah i sakhan zong kan lak leng ah an hriamthil cheukhat zong kan lakpiak hna. Cu sakhan cu kan khangh i kan hrawh dih, tiah KIA lei nih an thanh ve. Kahdohnak ah hliamhma tuarmi le nunnak a liam mi an um le um lo cu theih a si lo. Chunhnu ah Waimaw um SAC ralkap khah-lah-yiah 58 nih minung thazaang 50 hrawng an chap ṭhan caah kaphnih kar kahdohnak a chuak kho ṭhan, tiah KIA lei nih an thanh.

Monywa Laṭi Sang Um Mi Mytel Zung Cu PDF Nih An Luhhnawh i, Wifi Seh Pawl An Khangh!: Sagaing ramṭhen Monywa khua Laṭi sang ah SAC Ralkap nih a thli in an on mi Mytel zung cu nihin August ni 2 zaanlei suimilam 2 hrawng ah tualchung hriamtlai phu nih luhhnawh in an hrawhpiak hna, tiah Monywa People Defense Fotce (MPDF) sin in kan theih.

Mytel wifi seh 100 leng, Routers seh 4 line Cutter seh 4 laptop 4 le rian he aa pehtlaimi cauk pawl hna cu an lak i seh thilri pawl hna zong mei in kan khangh tiah MPDF nih an langhter. Mytel zung hrawhnak ah hin Monywa People Defense Force (MPDF) Monywa pengkomh Battalion 1 Monywa tualchung ralvengtu phu hna an i fonh tiah theih a si.