Thantlang Mizapi Uknak, Fimcawnnak Zung Nih Ngaihchiatnak Cathanh An Chuah! Hramhram uknak a doh i, Thantlang mizapi uknak nih tuahmi fimcawnnak ah cachimh rianṭuantu, Vounteer Salai Bawi Ṭha Peng cu 2022 June 8 ah a nunnak liam. Tantakmi chungkhar an ngaih chiatnak kan hrawmpi hna. Uknak ṭha lo a dongh tiang, a taangmi na hawile nih kan rak doh lai. Kan upatmi pasal ṭha Salai Bawi Ṭha Peng nang cu Pa Pathian ṭangnem ah i din cang law, tiah Thantlang mizapi uknak, fimcawnnak zung nih ngaihchiatnak cathanh an chuah.

Thawngdang Myinmu Khua ah Mipi 4 Hmai ah An Tlikter Hna i An Hnulei In Meithal In An Kah Hna. Sagaing ramṭhen Myinmu peng ah SAC ralkap nih mipi 4 cu an tlikter hna i an hnulei in meithal in an kah hna tiah Myinmu hmunhma lei thawngzamh nih an langhter. June 5 chung sml 1:30pm hrawngah SAC ralkap pawl cu Htisaung le Kanphya khua lei ah thazang 80 hrawng he an lut i Kanphya khuachung ah an hmuhmi thlam pawl kha mei in an khangh Kanphya khuami 1 zong an thah tiah theih asi.

Cun khuami cheukhat hna zong an tlaih hna i Nan luat khawhnak in zaam uh tiah ramvaih bantuk in an tlikter hna i an hnulei in an kah hna i khuami 4 an thi” tiah Myinmu peng thawng dik thanhtu phu nih an langhter. Cun khuami 1 nih Upa pakhat cu phenet a char lioah ralkap pakhat nih a hmuh i a tli lai tiah a ruah i a ka a an. A ka chungah meithal a hmuah i akah.

Nu pakhat zong a bag chung ummi thil vialte an chuahter dih i sui le tangka tampi a um caah hramhram in an chuh chih. An chuhmi a man zapi te sing 100 hrawng asi lai tiah a chim. SAC ralkap pawl nih a cunglei an thahmi hna telh in Kanphya khuami 7 zong an thah hna lengah minung 11 zong hostage caah an tlaih hna tiah PAFD nih a langhter.