Breaking News: Thantlang Khuachung Chin Ralkap Le SAC Ralkap An I Kap SAC Ralkap 2 An Thi. A luancia June 23 zanlei ah Chin ramkulh Thangtlang khuachung ah Chin ralkap CDF- Thantlang – CNA ṭangṭi le SAC ralkap kahdohnak a chuak. Cu kahdohnak ah SAC ralkap 2 an thi i, CDF-CNA lei in a thimi le aa hliammi kan um lo CDF Thantlang nih cathanh an chuah. Kah dohnak a dih a thaizing ah CDF Thantlang nih hmunhma zohfelnak kan tuah i hmun kip kakip ah thisen kan hmuh. Thawng kan theih ning ahcun SAC ralkap 2 an thi i, tam ngai hliamhma an pu tiah an langhter.

Thawngdang Tedim Peng Ah People People Defence Army(PDA) Pakhat Meithal Hma In A Nunnak A Liam! Tedim peng Kaptel khua pawng ah a luancia June 23 ahkhan PDA(People Defence Army) chungtel Do Siang Pian, kum 28 cu meithal kahnak hliamtuar in a nunnak liam tiah theih a si. Do Siang Pian cu a lu, a orhlei ban le a keng ah meithal hliamhma hmuh a si. June 25 chun suimilam 12:00 ah ruak vuinak an tuah tiah theih a si. Do Siang Piang kaptu cu aho an si theih a si rih lo.

Thawngdang relchih Lautu Mara Zophei Zotung le Senthang hriamtlai phu hna nih joint committee an ser ve cang. Mah pengtlang hna hi a hlan tein unau kan si tiah ram tampi ah ZZLMS committee ser in civui le i hawikomnak bawlungpuai hna tuahti lengmang asi. Atu cu hriam tlaih lei zong ah i naih niam deuh in riantuanti an i tim cang tinak asi. Tampi nih cun thiltha ah kan ruah ko lai nain cheukhat nih cun phan awk ah an ruah ve men lai. Senthang CDF khi Hakha CDF he an i rem lo CJDC zong ah an luhter duh hna lo.

Nain atu cu CJDC member 4 nih alliance an vun tuah tikah lungnuam lonak a um kho. CNF le CBCUSA hruaitu an biachim zoh tikah duhsah tein pengtlang CDF pawl hi hrawh in CNF/CNA ah luhter dih an timh hna timi hmuh khawh ngai a si. Abik in CNF sin lawng ah bawmhnak phaisa luhter mah tein a dirmi CDF pawl bawmhnak chah.

CNF kuttang ah a lutmi CDF lawng phaisa bawmh ve ding khi biapi ngai in an i timhmi pakhat cu asi. Nain tutan ZZLMS hma an lak ning zoh tikah I theih thiam lo ahcun hmailei kan Chin miphun kar ah buainak nganpi a chuak te kho timi hmuh chung khawh asi hriamtlai phu pakhat le pakhat kar ah i upatnak le i theihthiam nak a um a hau, i nek lo a biapi tuk te lai tinak asi.