Breaking News: Thantlang Ah Sac Ralhrang Nih Hriamnam Ngam Pipi An Puah. Thantlang ah SAC mithat phu nih Hakha lei hoih in hriam nam ngan zun tam ngai an puah. Chin Ramkulh Thantlang khuapi chung, SAC mithat phu nih 60 MM hriamnam ngan phun chun in an kah i zaantim ceo ah an dai tiah khuami sin in thawng kan theih. Hi kong he pehtlai in Thantlang khuami pakhat nih, Thantlang hi tuchun September 4 chun in 60MM hriamnam ngan an kah i tu naite tiang a si. Atu cu an

vun dai cang. Hliamtuar le nunnak liam an um le um lo bel kan thei rih lo tiah The Hakha Post ah a chim. Hriamnam ngan an kah hnu Than tlang khuapi chung le khua kiangkap ah Drone zong an thlah tiah theih a si. SAC ralkap pawl nih an sakhan in Hakha lam lei hoih in an puah mi a si i zei ruang set ah an puah ti theih a si lo.

Thawngdang Chin Ramkulh, Tedim khuapi ah Palek Sakhan Lutlai hruaimi palek hna cu September 4, zinglei sang suimilaam 11:00 fai i khua an hel lio ah PDF Tedim (Zoland) nih Palek bo khat rank a si mi Than Lin Oo cu meithal zuun thum in an kah i SAC mithat phu hna nih sii-inn ah an kalpi tiah kan theih. Hi kong he pehtlai in khuami pakhat nih Motor hme pahnih le palek motor pakhat an dihlak minung 12 nih khua an hel. Caah tihphang ngai khi asi.

Khua an hel lio ah PDF Tedim (Zoland) nih meithal zuun 20 in an kah hna i palek bo khat pakhat hma a pu. Hliam a tuar mi palek cu kha-lah-ya (269) SAC ralkap battalion nih sii-inn ah an kalpi,” tiah The Hakha Post ah a chim. SAC nih Myanmar ram uknak an laak hnu in Tedim khuapi chung ah SAC mithat phu lei riantuan palek le a dangdang an thah mi hna hi minung 5 leeng an si cang tiah kan theih.