Thai ram ah phungning loin a lutmi Myanmar minung 21 an tlaih hna Thai ram ah phungning loin a lutmi Myanmar rammi 21 cu Thai palik le ralkap fonh nih a luancia ni 2 chungah kan tlaih khawh hna tiah Bangkok Post nih alanghter. Tlaih a tongmi chungin pa 16 le nu 5 an i tel tiah theih a si. Bia an hal hna tikah Myanmar ram Mawlamyaing, Yangon, Bago le Rakhine in Thai ram ah rianṭuan ding in broker man Thai baht 15,000 in 30,000 tiang pek hnuah atu bantuk in kan luh hi a si tiah an leh hna.

An tlaihmi hna zapi te cu palik sakhaan ah biaceih an si lai i cu hnuah dantatnak pek an si lai tiah thawngzamh ah langhter a si. Myanmar ram ah hramhram in uknak lak a si hnu ah sipuazi a tla i rian a har caah Thai ram lei ah Myanmar ram mino pawl rianṭuan ding in asi khawh nak lam in an kal hna i nifatin ngawt in Thai palik nih an rak tlaih hna.

Thawngdang relhap Uknak Kan Laak Hnu In Thla 18 Chung Ah Tualchung Mi 6200 Leng Kan Tlaih Hna Tiah Min Aung Hlaing Nih A Chim Febuary 1, 2021 in July 2022 thla dih tiang ah tualchung mi kan tlaihmi hna hi 6,236 an si cang, tiah nihin August 1, 2022 ah SAC Chairman Min Aung Hlaing nih a chim. Uknak an laak hnu kum khat le cheu chung an ṭuanchuah khawhmi thil tete a chim pah in Min Aung Hlaing nih tualchung mi an tlaihmi hna zat cu a telh chih.

Kum khat le cheu chung ah bomb puahnak voi 7246, kahthahnak voi 6567 le meikhanghnak voi 1094 a chuak i, hriamnam phun phun in kah dohnak cu voi 6311, zen phunphun in kahdohnak voi 335,184 a chuak. Kutcheh bomb lung 11,715 kan laak, tiah Min Aung Hlaing nih cun a chim. A thimi hna chung ah phungki, cozah rianṭuan, ngakchia, uknak lei he aa pehtlaimi hna le mi sawhsawh(civil) 3483 leng an si. Hliam pumi 3065 an um i, a tlaumi 41 an um tiah a langhter.

Kahdohnak vialte chung ah Sagaing ramṭhen ah voi 4026, Yangon ramṭhen ah voi 2442, Mandalay ramṭhen ah 2194, Magwe ramṭhen ah cun 1359 kahdohnak a chuak. Thongtla zohkhenhtu phu, AAPP cazin ning ah SAC ralkap nih uknak an laak hnu in July 29, 2022 tiang ah tlaih a tongmi hi minung 11,820 an phan i, cu chung ah 1364 cu thong tla mi an si, tiah an langhter.

Gangaw Peng Khuate Ah SAC Ralkap Le Pyusawhti Nih Kum Tling Lo Nu An Tlaihhrem Hna! Magwe ramṭhen, Gangaw peng khuate cheu khat ah SAC ralkap le Pyusawhti nih kum tling lo nu an tlaih hrem hnu tiah Western Regional Military Headquarters PDF ṭuanvo ngeitu nih achim.

Gangaw peng khuate cheukhat ah July thla chung internet line an phih pinah SAC ralkap nih Vanlawng in voi tampi kahdohnak an tuah. Cu ruangah khuami hna nih an inn le lo an zamtak hna, tiah theih a si. SAC ralkap nih kahdohnak a chuahnak hmun paoh cu phone le internet line an phih dih. July thla chung ah Gangaw, Htilin le Kalay ah rallam an sial i, nihin tiang Vanlawng aa hel lengmang ko tiah atu Western Regional Military Headquarters PDF ṭuanvo ngeitu nih cun a chim.