Breaking News: Thai Ah Myanmar 3 Cu Lainawng Case In Tazacuai An Tong! Thailand ramchung Songkhla pengkomh ah Myanmar 1 thah a tonnak kong he pehtlaiin passport ngei lomi Myanmar rammi 3 cu an tlaih hna i midang pahnih zong an kawl cuahmah lio hna. Anmah nih Myanmar mi 1 cu an thah hnuah an phum tiah palek nih a chimmi cu Bangkok Newspaper ah an langhter.

Lainawngtu hna nih an chim ningin thah a tongtu Myanmar rammi Kum 40 tluk simi nih phaisa ningcang loin a hlen hna pinah anmah phu chungum nu pakhat zong tlik zaampi a timh tiah an chim. Hi kong he pehtlaiin Suamla pengkomh nih inn pakhat chung ah aa thupmi pass port ngei lomi Myanmar riantuantu 109 cu biahalnak le zohfelnak an tuah i, lainawn nak ah minung 8 an i tel, kan theih khawh hna tiah pengkomh palek bawibik nih a chim.

Lainawngtu an si lai tiah ruahmi minung 8 hna cu a liamcia June 1 ah khan an tlaih hna i, anmah nih an chim ningin lainawngtu taktak Myanmarmi 3 hna cu biaceih zungah chuahpi an si tiah theih a si. Tlaihmi 3 siseh an kawl cuahmahmi a dang 2 hna cu lainawng case le ruak hlonhnak case in tazacuai an si tiah palek bawibik nih a chim.

Thah a tongtu ruak zong cu an phorh than dih cang i, a citmi motorcycle zong tidil ah an hlonh i, cu zong cu kan laak khawh cang tiah palek bawibik nih a chim. Tazacuai a tongtu minung 3 hna nih chim ningin cuka hmun ahcun an thah hlan a nikhatnak, May 31 ah a rak phan tharmi an si i, Malaysia ram ah kal dingin caan karlak an hngah chungah atu bantukin thahnawnnak a chuak tiah palek bawibik nih a chim.