Tamu-Kalay Lam Cung Bomb Puahnak Ah SAC Ralkap 20 Hrawng An Thi. Tamu in Kalay lei a kalmi SAC ralkap 60 hrawng le motor run 24 cu bomb fimhlawm dingah hmai ah an rat caah Kalay peng, mengtung 55 pawng ah August 4 zing sml 11:00 hrawng ah bomb kan rak puah hnawh i, ralkap 20 hrawng an thi tiah PDF-Kalay nih cathanh an chuah. Bomb kan puahhnawh hna hnuah SAC ralkap nih an pawngkam um khuami cheukhat cu an tlaih hna. Zaanlei sml 6:30 hrawng ah SAC ralkap nih Yarsagyo khuachung cu hriamngan an kah tuk caah atu CDF-Tonzang PDF-ZaJu le PDF (Kalay) he kahdohnak achuak tiah theih asi.

Thawngdang Halkha Miphun paoh nih nunphung kan ngei dih! NUNPHUNG MIPHUN A VENGTUThla Hmung (Zion) Halkha Miphun lei paoh nih cun nun phung kan ngei dih. Cu nunphung cu miphun pakhat nih a thlau ahcun cu miphun cu a tlau cang tinak a si. Tahchunhnak ah Kawlram ahhin Pyu miphun an rak um i Kawlram hmanh a uk kho mi miphun an rak si.

Asinain an nunphung an thlau caah atu ah Kawlram khuazei hmanh ah Pyu miphun hmuh an si ti lo. Nunphung thlau ti hi nikhat zaankhat ah a thlaumi a si lo. Ziaza le nunning mah si bal lomi, miphun dang nunphung mah i hngalh lo kar i, i cawn le i lak in aa thawk. A thawkka ah a poi lo kan ti nain duhsah in zia ah an cang i, i phoih khawh a si ti lo. Cu i phoih khawh a si ti lomi zia cu a hnu ahcun mah zia ah a cang thai i mah nunphung kha uar khawh a si ti lo.Cun kanmah kokek kan nunphung kha kan thlau i midang nunphung tu kha kan i ziak. Cu hnu ah cun mi dang nunphung kha tefa hna nih mah nunphung ah an ruah i mah nunphung kha an hngal ti lo.

Cucaah atu te hin Laimi a simi paoh nih kan nunphung hi kan țanh i kan dirpi a herh. Kan dirpi khawh hnu kha cu kan miphun cu amah kan Lai Nunphung tu nih khan a kan ven cang lai. NUNPHUNG AH KAN RELH BAL LOMI NUNPHUNGNuphung timi cu mi pakhat asilole miphun phunkhat nih aa nunpi i a tuah zungzalmi nunning khi nunphung tiah keimah duh in ka hrilhfiah.

Cu nunphung lakah pakhat cu biaknak a si. Hlan kan pupa hna nih thing le lung an rak biak, khuachia an biak i rai an thawi tbk hna cu hlan pupa nunphung ah kan relh ko. Asinain atu chan kan biaknak a simi Sertu Pathian kan biaknak hi tuchan nunphung biaknak ah kan relh lo. Hihi kan palh hlah maw ti ka ruat tawn. Laimi cu Pathian nih a kan dawt i lamhlat piin amah Pathian kan hngalh naklai amah Pathian lila nih amah Pathian a um i sertu zong a sinak, dawtu zong a sinak cawnpiak ding in Mirang a rak kan thlahpiak.Cu hna cu Pathian nih a hman hna caah Laimi cu kan dihlak ngawt in Khrih a fa kan si cang. Mingaladon i training ka kai lio ah ka hawi Kawlpa nih ”Laimi cu Khrihfa nan si va si kaw Ti toih puai ( Zilawngpuai) hi nan hmang ve maw tiah a ka hal.

Kan hman ko. Nain nanmah nih biaknak he pehtlai in nan hman bantuk cun kan hmang lo. Nuamhnak sawhsawh ah kan hman tiah ka leh.Hi zawn i ka chim duhmi cu Laimi paoh Khrihfa an si. An si phung zong a si ti lungput a ngei ti a fiang. Cucaah Kawl nih Khrihfa sinak hi Laimi Nunphung ah an ruah ti ka ruat. Hi an ruahnak cu ka uar ngai. Cucaah Laimi nih hlan kan pupa hna an nunphung ah an biaknak kan relh bantukin nunphung kan ti tikah le nunphung he pehtlai in kan chim kan țial tikah Khrihfa biaknak hi Laimi kan nunphung ah relh cang usilaw ka duh ngai. THE LAIRAM TIMES VOL 1 ISSUE 22 Thelairamtimes