SAC nih a tuahmi Thantlang khua dirh le sersiam ṭhannak biaruahnak he pehtlai in Interim Chin National Consultative Council (ICNCC) nih cohlan lonak cathanh a chuah i SAC zertiamnak i ralrin ding in forhfialnak a tuah. SAC ralkap nih 2021 kum dongh thok in Thantlang khua cu voi 35 leng a khangh i khuachung biakinn telh in mipi inn 1,300 leng cu a ciam dih. Cucaah SAC riankhinhmi Chinram cozah nih Than tlang sersiam ṭhannak kong he pehtlai in tonbiaruahnak cu June 30 Hakha khua ah a tuah i cu thiltuah cu ICNCC nih ka cohlang lo tiah mipi theihternak cathanh cu July 3 ah a chuah ve.

Thantlang khua a rawhnak cu kokek thlichia ruangah si loin SAC ralkap pawl nih khanghpiak, hriamngan in kah le bom puah ruangah a si i June 23 tiangah Thantlang biakinn le biaknak lei inn telh in mipi inn 1,300 leng a rawk tiah langhter a si. Thantlang sersiam ṭhannak ding ah transitional Justice aa tel hrimhrim a hau, SAC nih amah a dohtu mipi pawl thazang tampi in a kah lioah cu bantuk thil cu a kal kho lo tiah a langhter.

Atulio caan ah, Thantlang khuachung ah hmunhma a khuarmi SAC ralkap pawl le CDF karlak ah kahdohnak a chuak kho peng mi a si caah mipi hna nih Thantlang khua luh ṭhan le um ṭhan nak ding caah himnak a um rih lo tiah ralrin a pek fawn. Cun Thantlang khua sersiam le dirh ṭhannak cu mipi uknak phu pawl, mipi hriamtlai phu pawl, ramchung ramleng um Thantlang mipi pawl telh in ṭuan ding rian a si tiah ICNCC nih a chim fawn.

Chinland Defense Force – Thantlang zong nih SAC hruainak in tuahmi Thantlang sersiam le dirh ṭhannak program cu cohlan asi lo tiah June 2 ah cathanh a chuah ve. Dothlennak caan chungah SAC nih Dothlennak a tha a zornak hnga a tuahmi thil vialte cohlan a si lo tiah CDF Than tlang nih a thanh. Thantlang khua ah hmunhma a khuarmi SAC ralkap pawl thah dih an si hlan a si lo le himnak a ummi dirhmun a phan cang tiah thawngthanh a si hlan lo Thantlang khuachung luh ṭhan le sersiam ṭhan a si lai lo tiah CDF-Thantlang nih fiang tein thawng a thanh.