Breaking News: Sac Ralkap Cu Zinglei Ah Mawtaw Pahnih In Timit Leiah An i Thawh Cang. Nihin August 16 zinglei ah Motor pahnih in ral kap cu Timit lei ah an kal, tiah theih a si. Hakha ummi pakhat nih an kal hnu sml pakhat a rauh hrawng ah Ruavazung lei kap in atu hi puah nak achuak. Meithal thawng le bomb thawng a thang. Caan sau cu a thang lo. Minutes 5 chung hrawng a thang, tiah The Chin Post ah a chim.

Thawngdnag Nihin August 15 ah, Kalaymyo khuapi datsi man cu gallon khat ah Ks. 20,000 a phan cang, lamkam datsi zuarnak dawr ah cun cycle pakhat nih gallon khat nak tam cawk a ngah lo, tiah theih a si. Kalaymyo khuachung um mi datsi cawtu pakhat nih Lamkam ah datsi zuartu hna nih gallon khat ah Ks. 18,000 in Ks.20,000 ah an kaih cu hmanh cu cycle pakhat ah gallon khat leng cawk an kan sianh lo cu hlan ah cun datsi litre khat ah Ks.1000 in kan cawk nain, atu ah cun litre khat ah Ks. 5000 a si cang. Dawr ngan deuh cu chun hnu in an khar, lamkam dawr pawl tu ah cun tlawm tete in cawk khawh rih asi tiah a chim.

Datsi laknak a har leng ah lampi ah caan saupi a rauh tawn caah Kalaymyo khuapi datsi dawr ngan deuh zong chunnitlak zuar ding an ngei hna lo, tiah theih a si. Datsi dawr ngan ngeitu pakhat nih cun, “Datsi kan zuarmi hi chunnitlak zuar ding a um lo, chun suimilam 12:00 tiang hrawng lawng kan zuar. Kawl lei zong ah cu hlan bantuk in datsi kan duhzat kan caw kho lo,” tiah a chim.

Kalaymyo ah hin August 12 zing lei tiang ahkhan datsi gallon khat ah Ks. 12,000 a si i, zaanlei ah cun ks.14,000 ah a kai. Chin ramkulh, Hakha khuapi zong ah datsi gallon khat ah Ks.15,000 a phan i, caan rau lo ah datsi a dih kho dirhmun a phan, tiah theih a si. Credit: The Chin Post

Thawngpang dang: August zarh hnihnak, Karenni ramkulh chung kahdohnak ah SAC ralkap 19 an thi i, Karenni ralkap phufonh lei in ralkap pakhat nunnak a liam ve, tiah KNDF nih cathanh an chuah. August 8 le August 9 ah Shiataw pengchung SAC ralkap le KA- KNDF phufonh kar cu voi li tiang kahdohnak a chuak, cu kahdohnak ah cun SAC ralkap lei 8 an thi, tiah KNDF nih an thanh.

Hpruso peng ah SAC ralkap khah-lah-yiah 531 le Karenni hriamtlai phufonh kar cu Aug 9 ah, suimilam 3 tluk hrawng kahdohnak a chuak i, cu kahdohnak ah cun Karenni ralkap lei in ralkap pakhat a nunnak liam, tiah theih a si.

August 9 ṭhiam ah, Demoso peng Sanpiah meng 6 khua ah SAC ralkap le KNDF battalion 9 kar kahdohnak a chuak i, SAC ralkap 5 an thi. Cu ni zaanlei ah cun Demoso palik sakhan cu KNDF nih luhhnawh in an kah ṭhan hna i, SAC ralkap lei a thimi an um, tiah an thanh. August 12 ah Ruphaekhu sang Baptist Biakinn pawng ah kahdohnak a chuak i, SAC ralkap pakhat a thi, tiah theih a si.

SAC ralkap hna nih kahdohnak a chuahnak khua pawng um mi khuami hna cu ralphaw ah an tlaih hna. Cupinah Loilinlay peng, Dawpapah khua cu SAC ralkap nih vanlei in an kah caah tualchung mi pakhat a nunnak a liam i, 2 nih hliamhma an tuar, tiah KNDF nih cathanh an chuah.