Breaking News: Rihkhawdar Camp Cu CDF-Hualngoram Nih Nihnih Chung An Kah. Rihkhawdar Camp Cu CDF-Hualngoram Nih Nihnih Chung An Kah Chin ramkulh, India-Myanmar ramri Rihkhawdar SAC ralkap camp cu CDF-Hualngoram nih July 25-26 tiang an kah, tiah theih a si. CDF-Hualngoram nih khuachung kahdohnak an tuah i, Rihkhawdar ralkap camp cu kan kah. SAC ralkap nih a dik lo ning in minung pali thihdan an pekmi hna ca ah teirul kan chammi asi, tiah CDF-Hualngoram nih cathanh an chuah.

A voikhatnak i kahdohnak cu minutes 40 hrawng a rau, a voihnihnak kahdohnak cu minutes 20 hrawng a rau. Cu kahdohnak ah CDF-Hual ngoram nih hriamngan he hriamhme he kan kah hna caah SAC ralkap a thimi le aa hliammi kan thei rih lo. Kanmah leiin a thimi le aa hliam mi kan um lo tiah an langhter.

Thawngdang Mindat Ah Kum 112 Putar Pa Cu Ral A Zamnak Ah A Nunnak Liam! Chin ramkulh, Mindat ah kum 112 putar pa cu ral a zamnak ah July 27 zan ah a nunnak liam, tiah theih a si. A nunnak liammi Pu Ng’Lo Awm Ghung cu Chin pupa hna nih an rak hmanmi phungthlukbia le holh thuk a thiammi le a hngalmi a si i, mino hna cu Chin phungthlukbia a chimh tawn hna.

Pu Ng’Lo Awm Ghung cu Chinmi nunphung lupawng pawnh- Ar hmul- Nam le Paiper a tlaihchan pin ah aa hruk aih zungzal mi a si. Mindat peng ah kum upa bik a si ko lai, tiah a chungkhar he naihniam mi pakhat nih a chim. Putar pa cu Mindat-Matupi lam pawng khuate ah a ummi a si i, an khua cu SAC ralkap nih an khangh pin ah an khua pawngkam ah bomb an hmanh dih hna tiah theih a si.

Cu putar cu Mirang le Japan chan lio a tong mi a si. Ralkap nih nawlngeihnak an lak hnu in a nunchung thil a tonmi ah SAC ralkap nih an kan tuahto ning hi a faak tuk, Mirang le Japan nakin a zual deuh tiah a chim. Mindat peng ah ralzam mi cu eidin le sii-ai an har tuk caah tarnu tarpa hna le ngakchia hna cu atu le atu an nunnak liam, tiah theih a si. Credit: The Chin Post

Thawngdang: Hakha Peng, Tilak Khuami an Zapi Ngawt in Khua dangdang ah an Zaam Hna! Hakha peng, Tilak khua ah SAC ralhrang pawl an phanh caah khuami an zapi ngawt in khuadang ah an zaam hna, tiah a zaam vemi Tilak khua upa pakhat nih The Chin Journal ah a chim.

“Cacawn ninga ni (July 22) ah khan kan khua ah an rak phan. Zarhte ni ah kan khua in an chuak i, a thaizing Zarhpi ni ah an rak kir tthan. Zarhpi ni i kan khua an rak phanh tthan ah cun khuachung hmun kip ah hmunhma an la, meithal zong a kan puah hnawh len caah khua ah kan um ngam ti hna lo. Khuami thilri an lakmi a um len pin ah innzuat sattil an duhduh in an i thah. Atu hi cu kan khuami zatuak in 90% hi cu kan zaam dih cang hna,” tiah a chim.

SAC ralhrang pawl Tilak khua an phanh lecang in miphun ralkap pawl an i ton tawnnak inn pakhat an luh hnawh colh caah Tilak khua ah ralhrang thawngpetu an um kho tiah an ruahdamh. Nihin July 28 zinglei tiang ah cun i kahdohnak a um lo bang in tlaihkhih a tongmi zong an um lo. Tilak khua cu Gangaw peng Daidin (Shungshi) khua he meng 10 a hlatnak ah a ummi a si i, khuami a tam u cu Daidin ah an zaam hna.

Daidin ah a phanmi sayama pakhat nih “Nizan le nihin zing tiang minung kan i rel ning ah cun Daidin ah hin minung 300 hrawng kan phan lai. Cun khua dangdang ah a pikpak in a zaammi an um ve hna,” tiah a chim. Tilak khua ah inn 120 hrawng a um i milu hi 500 in 600 karlak an si.

Tilak in Laitlang lei kap ah a ummi Keizuan khuami hna zong ralhrang an rak phan sual ah tiin thinphang in an um hna. Keizuan khua upa pakhat nih, “Atu tiang hin cun kan khua ah an rak phan rih lo. Laitlang lei an rak kai ahcun kan khua hi an pal khawhmi a si. Zaam ding in kan i tim ve ko hna,” tiah a chim. Tilak ah a phanmi SAC ralhrang pawl hi khoika lei ah an kal timi khuami nih an thei kho lo.

Gangaw pawng khuate ah a ummi minung pakhat nih, “July 18 ah khan Tilak lei ah ralkap pawl cu kal an i thawh. Mah ni thawk khan Gangaw peng chung phone thah hram an thawk. Ralkap hi 100 hrawng an si. Tilak khua in an chuak cang an ti nain nihin (July 28) zinglei tiang ah cun Gangaw lei ah an rak kirmi kan hmunhna lo,” tiah a chim.