Breaking News: Ralhrangbu Nih Helicopter In Hakha Minung An Kah Cang Hna Mipi An Lautuk. Nizaan ah Hakha thar ah Meihri tuah lei rian a ttuan mi mino (20) hrawng cu Ralkap nih Helicopter in an kah hna, Helicopter cung in an hun kah hna hi asi tiah Zalen nih a tarlangh. Hi thil hi nizaan September 3, 2021 zaanlei suimilam 1:00pm hrawng ah a cang mi a si. Hakha thar hi NLD Cozah chan ah an samh mi, atu ralhrang ralkap zong nih an pehzulh mi asi.Hi kong he pehtlai in Meihri zamnak ah aa tel ve mi pakhat nih Mino rian a ttuan mi hi minung 15 in 20 karlak kan si. Zeitin dah ralkap pawl kan pawng an rak phak zong kan thei manh lo.

An kan kah hi zaanlei suimilam 1:30PM hrawng ah a si lai. Ralkap kan sin a rak phan mi hi 50 in 60 karlak an si lai. Meithal zun 30 tluk hrawng an puah. Kan lau tuk ve caah phu(3) ah kan i thendarh i kan i thup cio. A dang a zam mi phu pawl cu Helicopter cung zong in an rak kah chih len hna. CDF ah an kan ruah ruang ah a tu bantuk in an kan kah hi a si ko lai.

Hliamtuar tu cu pakhat hmanh kan um hrawh lo” tiah a chim.Nizaan ah Ralkap Helicopter Hakha ah voi 2 tiang a rak zuang ti asi. Cun atu Cozah lei Meihri a buaipi cuahmah mi, a tuah mi pawl zong taanglei in an kah hna lawng si loin, Helicopter cung tiang in an hun kah hna cu a poi ngai ngai. Mah thawngpang hi nizaan ta asi i atheih rih lo mi caah share than mi asi.