Voi 35 khangh a tongmi Thantlang khuapi hmundang ah thial ding in SAC nih timhlammi a tlamtling lo. SAC nih uknak an laak hnu an khangh dih cikcek mi Chin Ramkulh, Thantlang khuapi cu Ramkulh SAC Cozah nih remh than loin hmundang ah thial ding a timhlamh a ngeih mi cu Ramkomh SAC Cozah upa nih an cohlang lo tiah theih a si.

Thantlang ser remh than loin hmun dang ah thial a timhnak hmun hi Myanmar le India Ramri, Thantlang Peng Dawn khua ah a si tiah kan theih. “A liamcia 2022 June 30 ahkhan Ramkulh SAC Cozah lei meeting an thu. Thantlang kong ah a bik in biaruahnak le timhlamhnak an ngeih mi pawl caih a si.

A rawk cang ti awk in a ummi Thantlang khuapi hi remh than le ser than loin hmundang ah thial ding in, tuanvo ngeitu hna nih Naypytaw lei ah ca an tial. Asinain Ramkomh lei nih an duh lo. Ca an tial mi hi Dawn khua ah a si nain an duh lo an cohlang lo tiah kan theih than,” tiah min langhter duh lo pakhat nih Mizzama – News in Burmese ah a chim. Dawn khua hi Thantlang Peng, Zahnak Tlang khuachung ah a um i a inn in inn 250 leeng an si. Dawn khua hi Mizoram he aa naihnak cem hmun ah a ummi khua pakhat a si. Credit: Chin Cable Network Channel

Thawngpang dang: Thantlang Khuapi Cu Dawn Khua Ah Ṭhial Ding In Chin Ramkulh SAC Cozah Nih Timhtuahnak An Ngei! SAC ralkap nih an khangh i an hrawh dih cang mi Thantlang khua cu a thar in sersiam ti loin, India le Thantlang ramri Dawn khua ah ṭhial ding in SAC ramkulh cozah nih timhtuahnak a rak ngei, tiah Mizzima nih a ṭial.

Thantlang ṭhial an timhnak hmun, Dawn khua cu India le Myanmar ramri Tio tiva kam ah a ummi khua pakhat a si i, inn 250 hrawng umnak khua a si. “A luancia June 30 ah khan Chin ramkulh cozah nih Thantlang khua remh le sersiam ṭhannak ding kong ah tonbiaruahnak an rak ngei. A rawkmi Thantlang khua cu sersiam ti loin, hmundang ah ṭhial ding in a rem hnga maw, tiah ramkulh cozah nih rampi(Union) cozah sin ah halnak a tuah.

An chim ning ah cun ramri zong a si caah India he i pehtonhnak ah a ṭha, tiah an langhter nain, rampi cozah nih lungtlinpi lonak cakuat a leh hna,” tiah min langhter duh lo mi pakhat nih a chim. Thangtlang um SAC ralkap hna nih Thantlang khua cu voi 35 tiang an duah caah, Thantlang khuachung inn a thong leng a kang i, mipi dihlak cu India ram le ramri lei ah ralhrial in an um hna.