Pale Ah Saikel In Achawkvel Mi Ralhrang Bomb In Puah An Si 7 An Thi. Pale ah Saikel in a chawkvel mi ralhrang bomb in puah an si 7 an thi 4 hliam an tuar tiah theih asi. Yangon palek batalion 9 bomb puah an si 3 hliam an si. Sagaing ramthen Pale peng ah Saikel in a chawkvel mi ralhrang 30 leng cu nihin September 7 zinglei ah mipi ralkap PRA le PDF nih bomb in an puah hna caah mi 7 an thi 4 hliam an tuar tiah PRA  nih a thanh. Tuni September 8 zaanlei suimilam 1:45 ah Yangon zalampi cungah ralhrang kuttang Palek batalion 9 ah bomh voithum in puah an si i ralhrang 3 an i hliam tiah CGF nih a thanh.

Thawngdang Sept 9, thaizingah online in tuah dingmi ASEAN South Asea ramkhel party hna le China Communist Party tonbiaruah nak ah China Communist Party sawm nak bantukin Myanmar in NLD USDP le party dang pahnih an i tel ve lai tiah theih a si. NLD lei in Committee Representing Pyidaungsuh Hlutdaw CRPH le Committee Representing Yangon Region Hlutdaw CRYH ah chungtel a si liomi U BoBo Oo akai lai. Anih hi 2020 thimnak ah Dalah peng Constituency 2 in teinak a hmuhmi hlutdaw palai a si.

ASEAN Asea ramkhel party hna le China Communist Party biaruahnak hi kumon an tuah tawnmi asi. Myanmar in party 4 an kan sawm nain chimrel nak caan pek ding timi aa tel lo caah zeihmanh kan chimrel kho lai ka zum lo tiah U Bobo Oo nih RFA ah a chim. USDP lei in Central Youth Committee a pahnihnak hruaitu Dr. Thanh Zaw Lwin aa tel lai tiah party chimnak nawlngeitu Dr. Nanda Myint nih a facebook ah a tial.

Strengthening Political Parties Corporation in Joint Pursuit of Economic Development timi tlangtar in tuah dingmi ASEAN Asea ramkhel party hna le China Communist Party online biaruahnak ah tel ve dingin China nih Myanmar ramkhel 4 a sawmmi hna ah NLD le USDP cu fiangtein langhter a si nain a dang party pahnih cu langhter a si rih lo tiah RFA nih atial.