Breaking News: NUG Ramdang Palai Le Sweden Ramdang Palai Tonnak An Ngei. National Unity Givernment NUG ramdang palai Foreign Ministe Zin Mar Aung le Sweden ramdang palai Ann Linde cu nizan June 8 ah tonnak an ngei i, Myanmar ram Democracy kong an ceih tiah NUG nih cathanh an chuah.

Tonbiaruahnak ah cun Myanmar ram Democracy kong ah ram hnih i bawm in rianṭuanṭi ding Federal Democracy ram thar sernak caah Myanmar rammi nih zeizong vialte kaltaak in ralkap an dohnak khat le khat zawnruahnak lungput he Myanmar rammi bawmhchanhnak kong le SAC ralkap nih rammi cung ah an sualnak kong hna an ceih, tiah theih a si. Democracy cu Myanmar rammi hna nih an aupi pengmi le an cohlan mi a sinak kong cu Sweden ramdang palai Ann Linde nih a Twitter ah a ṭial.

Thawngdang Nat Inn khua Ah Pyusawthi Hruaitu Pa Nih Kum 8 Hrawng Siangngakchia Nu A Tlaihhrem!! Sagaing ramṭhen Kanbalu peng nichuah lei meng 4 hlatnak Nat Inn khua sianginn ah, SAC ralkap he umhmun khuarmi Pyusawthi hruaitu pa nih kum 8 hrawng siangngak chia nute a tlaihhrem tiah Infinity Group nih an thanh. Nat Inn khuami kum 8 hrawng siangngak chia nu taang hnih kai liomi cu an khua pa Pyusawthi hruaitu kum35 Shwe Ba nih June 6 ahkhan asualpi tiah Infinity Group nih an langhter.

Pyusawthi an umnak sianginn chung ah ngakchia nu te cu a kalpi i a tlaihhrem. Khuami an thin dam deuhnak dingah SAC ralkap pawl nih Pyusawthi pa cu, voikhat hnih an tuk an velh. Nat Inn khua cu Pyusawthi an tam tuk caah sianginn an kai dih. Asinain tlaihhrem atongmi ngakchia nu belte cu siangin an kaiter ti lo tiah tualchung mi pakhat nih achim.

Siangngakchia nute tlaihhrem a si kong thawngpang cu a thang sual lai ti an phan tuk caah SAC ralkap nih ngakchia nute chungkhar hna cu kyats sing 30 in an nawl hna, tiah Infinity Group nih a langhter chih. Nat Inn khua ummi SAC ralkap cu 3 hrawng lawng an si i, adang cu Pyu sawthi lawngte an si, tiah tualchung mi hna sin in theih asi.

Walet Peng BoTey Khuami Pakhat Cu SAC Ralkap nih Mei In An Khangh, Minung 5 Ralphaw Ah An Hman Hna: Sagaing ramṭhen, Walet peng BoTey khua ah SAC ralkap cu June 8 ah an lut i, kum 18 hrawng mino Ze Yar Khaing cu mei in an khangh pin ah minung 5 cu ralphaw ah an hman hna, tiah theih a si. Shwebo in a rami SAC ralkap 100 hrawng cu, BoTey khua ah chun sml 12:00 hrawng ah an lut.

BoTey khuami pakhat an thah pin ah a dang minung 5 hna cu an tlaih hna i, ralphaw ah an hman hna.Ka fapa he cun kan zaamṭi ko nain a paw a ṭam tuk caah Meithal thawng a daih in khua chung ah ava kal i, cu thawk cun kan i pehtlai kho ti lo. Zan a muih lai ceo ah mei in an khanghnak a ruak cu kan hmuh,” tiah mei khangh a tongmi Ze Yar Khaing apa nih achim. SAC ralkap pawl nih BoTey khuami hna inn cu an baoh i, thil man sung an fir. Khuachung ah aa thupmi hna cu an tlaih hna i, ralphaw ah an hman hna tiah theih a si.

An tlaihmi hna cu nu 4 le pa 1 an si i, inn an hrawhmi le thilri an firmi hna cu ‘PDF nih an tuahmi a si,’ tiah ralkap pawl nih tarnu tarpa hna cu nan chim lai an ti hna,” tiah Bo Tey khuami pakhat nih a chim. SAC ralkap pawl cu BoTey khua in zanlei sml 6:00 hrawng in an chuak i, Tapithar(သပြေသာ) ah an riak, tiah theih a si.