Breaking News: NUG President Nih Kawl Ram Mipi Hna Caah Abiapi Tuk Mi Thawngthanh Atuah Cang. National Unity Government (NUG) cozah i Acting President a simi Duwa Lashi La nih Sept 7, tuzing ah rammi hna sinah a biapi tukmi bia a thanh cang. A biathanhmi cu 14 a si i cu chungah mipi caah a biapi hleicemi kan vun langhter. Pakhatnak September 7 tuni thok in ram pumpi huap dothlennak ni D-Day cu aa thok cang. Pahnihnak: Mipi vengtu ralkap hna nih nanmah le umnak i ralhrang le anmah bawmtu hna kha i hmaithlak in doh cang hna u!

Pathumnak Ralhrang khanhmi veng/sang le khua uktu vialte a rannak in nan rian chuahtak uh. Palinak Mipi vengtu ralkap nih mipi nunnak le inn lo kha ralring tein kilveng u, cunglei upa hna chimmi ngai ulaw NUG Defence Ministry nih kahdohnak zulhphung a chuahmi kha zulh khawh i zuam uh. Panganak Tuni Sept 7 thok in mipi nih umkal le chawhvah i ralring ulaw ei din le sii-ai i chiah ulaw mipi vengtu ralkap kha thawngpang peknak le a dangdang in rak bawm hna u. Paruknak Tlangcung hriamtlaibu vialte nih hmunkhat ah ralhrang doh dih cang u. Pasarihnak: Tuni, Sept 7 thok in ralhrang tangah zungkai ti lo dingin ralrin kan in pek hna.

Dothlennak ahhin teinak hmuhnak dingah a biapi bikmi cu mipi thapeknak a si. Mipi nih dothlennak tuahtu hna lei ah kan dir ahcun teinak he kan i hlat lo. Cuba revolution tuanbia kan zoh tik zongah Che Guevara hruaimi dohlennak tuahtu ralkap tlawmte cu rammi dihlak in tha an pek hna, an phaknak hmun le khua kip ah tirawl lei in siseh thawng peknak in siseh an bawmh hna caah teinak an hmuh. Kan ram zongah mipi nih dothlennak tuahtu ralkap kan dirpi i tha kan pek hna ahcun teinak kan hmuh hrimhrim lai.