Breaking News: NUG Nih D-Day Athanh Mi Cu Lungrethei Ngai Asi Ralkap Sac Ralkap An Tam Chin Chin Cang. Ram pumpi huap ralthawh ni D-Day thanh a si hnuah NUG e pehtlaitu SAC ralkap an tam chin lengmang tiah theih a si. CDM tuah in NUG le PDF ah luh a duhmi SAC ralkap hna nih direct in NUG ah pehtlaih si loin karlak ah pehtlaihtertu bu pakhat an um. Cucu CDM ralbawi hna hruaimi Pyituh Yinkhone a si. Hi Pyituh Yinkhone hruaitu hna nih D-Day thanh hnuah NUG a pehtlaitu SAC ralkap an tam tuk tiah an chim.

D-Day thanhmi cu ramchung mipi le mipi vengtu ralkap hna nih cun lunglawm tein an cohlan, asinain ram cheukhat nih cun an lungretheih nak kong an chim ve. Special Advisory Council for Myanmar SAC-M zong nih Sept 8 tuni ah Myanmar mipi hna dirhmun le temtuarnak cu kan theihthiam tuk ko nain NUG nih D-Day a thanhmi kongah cun kan lungre a thei ko tiah cathanh an chuah.

Hlutdaw palai U Sithu Maung nih cun Kan ram tuanbia kan zoh tikah hriamtlaih ramkhel tuahnak ah hrihhram kan rak ngei cang. Kan i timh mi cu Federal Democracy uknak a si. Cu cungah kan i timhmi aa fun dih caah NUG nih D-Day a thanhmi hi a si tiah ka ruah.  Nih Cun D-Day thanh hlan zongah khan mino tampi cu a phunphun in dothlennak ah an i tel cang. Atu hi phungning tein thanh a si cang caah dothlennak thazaang a thawng chinchin lai ti hi ka zumhning a si tiah a chim.

Karenni Democratic Front (KNDF) hruaitu U Kyaw Htet nih cun NUG thanhmi he pehtlai in D-Day ti a si zongah, dothlennak ni ti a si zong ah kan nih cu kan cohlan ko. Kannih hmunhma ah cun D-Day a sinak a sau cang cu teh. Atu D-Day an thanh in ramchung hmunkip ah kah dohnak a chuak colh. Cutikah kanmah lei kahdohnak a nem deuh ngaingai. Hmasa ah cun kahdohnak hi Kachin Karenni le Karen ramkulh ah a fak khun, atu cu ramchung hmunkip ah kahdohnak a chuak cang. Ralhrangbu kan nawr deuhdeuh tinak a si tiah a chim ve.

KNDF hruaitu U Kyaw Htet nih cun D-Day an thanhmi hi a tlai hmanh a tlai tuk, tuan khan thanh diam cang ding a si tiah a chim chap. Asi nain khatlei ah PDF cheukhat hna cu hriamnam le raldoh cawnnak ah an i manh rih lo caah lungre a thei in an um ve tiah theih a si. A um ciami PDF hmanh an i manh thlu rih lo lioah NUG le PDF ah luh dingin Pyithu Yinkhone ah min cazin a pemi an tam chin lengmang fawn. Hi hna vialte ei le din thutdirnak le an i tlaih dingmi hriamnam kong ruah tikah lungrethei cu a si ve hrim ko. Khatlei in covid nih a kan den chuahmah hoi tikah lungretheihnak aa phua. Ral le rai lakah mipi kan i tenh.