Breaking News: Myanmar Rammi Hna Hi Philh Hlah U, Tiah Pope Nih Forh. 2021 Febuary 1 ah SAC nih nawlngeihnak a laak hnuin a chuak mi buainak le rammi mizapi nih an ton cuahmahmi hna hi vawlei cung ram dang dang hna nih philh hlah u, tiin Pope nih cathanh chuah in a forh hna. Minung le minung i zawhruahnak le i bawmhchannak aum tuk rih lonak Myanmar ramchung mizapi hna i temhtuarnak cu kan hna nih a theih peng rih. Cu pinah Myanmar mipi hna nih SAC kut in himnak an hmuh khawh nakhnga siseh inn lo meikhanghpiak an ton cuah mah ruangah siseh ralzaam in an umnak asi taih a chim.

Kan hnuzarh chungah Myanmar ramchung Catholic hruaitu hna nih a hnubik conference an ngeih lioah cathanh an chuahmi ahcun pehzulh in buainak a chuah ruangah Myanmar rammi nih an tonmi harnak kong ah kan thin a phang tuk tiah an langhter. Cu pinah SAC nih minung nunnak le dignity hna hi man ngeihter hmaizah dingin an nawl chih. Nunnak man a ngeihzia hi upat ding pumhnak biakinn sizung telh in sianginn tibantuk hna cu tongh hrimhrim lo dingin an nawl chih.

Thawngdang Chin National Organization CNO Nih Thawng Fianternak Tuah Chin ramkulh, Falam khua umhmun khuarmi Kah La Yah 268 in June 15 zan ah Cinmual sang No.2 sianginn kam ah a thawng thang sawhsawh mi bomb an rak puah caah mizapi cu thinphang thla lau in an um. Cu bomb cu mizapi le CNO/CNDF karah hmuhthiam lonak um seh tiah SAC ralkap nih an tuah hramhram mi asi. Cu pinah nan fanu le nan fapa an ruak nan hmuh duh hna lo ahcun sianginn kai hlah u timi tlirhnak ca zong an tar.

June 17 zan sml 10:00 hrawng ah Tlanglu sang No.3 sianginn ah a umi SAC ralkap karah kahdohnak a chuak i, ralkap 1 athi tiah theih a si.
SAC ralkap pawl nih meithal an kah thluamah caah Falam khua um pakhat cu a kut ah an khen caah hliamhma apu. Inn chung thilri cheu khat zong an rawk. Baila khua inn pakhat zong hriamngan nih an khen tiah theih asi.

Hi vialte thil acang mi hna hi SAC ralkap nih mizapi le CNO/CNDF karah hmuhthiam lonak um seh ti an duh caah asi. CNO/CNDF nih kan tuahmi hrimhrim asi lo. Cun vawleicung upadi kan zulh caah siangngakchia le sianginn cu hrawhnak le hnorsuannak kan tuah lai lo tiah cathanh an chuah.

Thawngdang Daw Aung San Suu Gyi Chuahni Nikhat Luan Hnu Ah An Tuahpiak. Daw Aung San Suu Gyi chuahni nikhat luan hnu ah an tuahpiak June 19, ah chuah camtuak a phanmi rampi ruahnak petu Daw Aung San Suu Gyi cu ( kum 77) a tlin nikhat a luan hnu, June 20 Naypyidaw Special Court ah a mah sihni hna he a chuahcamtuak hmanṭinak an ngei tiah biaceihzung he neihniam in ummi nih an chim.Cu zung ah cun birthday cake khuainak an tuah.

Birthday cake cu a mah sihni hna le biaceihzung rianṭuan tu dihlak zong dangh an si tiah an chimchap. Mizapi nih chuah camtuak lawmh pinak an tuahpiaknak cung ah lunglawmh biachimnak le mizapi nih ngandam tein an um cio nak ding caah thlacamnak ka ngei tiin a chim tiah biaceihzung he neihniam in ummi hna nih an chim.

NLD cozah chan lio helicopter hlannak kong he pehtlai in NLD cozah chan rescue people deputy minister U Soe Aung cu nihin June 20, zung chauh caan ah checkhlatnak an tuah tiah biaceihzung he neihniam in ummi nih an chim. Cun Nihin zung chuahcaan ah biaceihzung a phan mi hna president U Win Myint le rampi ruahnak pe tu Daw Aung San Suu Gyi cu an pahnih in an ngandamnak aṭha tiah theih asi.

Daw Aung San Suu Gyi (kum 77) a tlin chuahcamtuak lawmhpinak cu ramchung ramleng hmunkip ah a phunphun in lawmhpinak an rak tuah cio Daw Aung San Suu Gyi telh in ramkhel lei thongtla dihlak nih luatnak an hmuhnak ding caah nawlnak zong an tuah. Rampi ruah nak pe tu Daw Aung San Suu Gyi cu kum 77 a tlin tiangah thonginn ah caan tampi a hmang tu a si i, a chuahcamtuak phak voi 17 tiang thong inn chungah caan a hmang tiah theih a si.