Breaking News: Myanmar Ralzaam Zatuak 99(99%) Leng ID Card An Pek Cang Hna. India ram Mizoram ramkulh ah a zaam mi Myanmar ralzaam zatuak 99 leng cu, ID card an pek cang hna tiah theih asi. Mizoram ramkulh Minister of Home Affairs hruainak in High-Level Committee on Myanmar refugee’s phu nih Mizoram ramkulh ah aa dormi ralzaam 29964 chung ah 29751 cu ID card an pek cang hna, tiah The Aizawl Post nih an langhter.

SAC nih uknak laak hnu in mizapi nih a phun phun in duhlonak langhter asi. SAC ralkap nih duhlonak langhter tu paoh hremnak tlaihkhih le thahnawnnak a tuah caah Sagaing ramṭhen le Chin ramkulh ummi hna cu Mizoram ah zaam cio asi. Mizoram ah a zaam ni Myanmar ral zaam cazin laaknak cu Mizoram cozah nih ramkulh,pengkomh le khuakomh tiang in Committee a ser i, Febuary thla in ID card pek khawh ding a rak tawlrel cang, tiah theih a si. High-Level Committee on Myanmar refugee’s phu nih cazin an laak ning ah Mizoram pengkomh 6 chung ah Myanmar ralzaam camp 149 a um. Cu camp hna ah ralzaam 11833 an um i, ralzaam camp a si lomi ah aa dormi hi 18131 an si tiah an langhter.

Thawngpang dang Hakha ah Non-CDM pawl Dalan pawl le SAC a cohlangmi pawl vawlei hmunhma chuh an si lai. Chin ramkulh lei Hakha peng chungah Non CDMers pawl Dalan pawl le hramhram uknak a latu Min Aung Hliang phu a cohlangmi pawl cu vawlei hmunhma pek an si lai lo i an ngeih ciami zong chuh ṭhan an si lai tiah CDF-Hakha Council nih June 15 ah a thanh.Hakha peng chung, vawlei hmunhma ngeih nak kong he peh tlai in mipi hna nih thei hna seh tiah CDF-Hakha Council i a voikhatnak meeting ah biacahnak ngeihmi a si tiah an langhter.

Chuh ṭhan a si lai mi vawlei chung chuak thilriI in hmun lo hmun lei hmun tlanglo hmun dum hmun le vawlei lawng vialte a herhnak ah hman asi lai tiah cathanh ah an langhter. Cun hramhram in uknak lak a si hlan ah Peng le khuate hna ah rianṭuanmi le chungtel a rak si ah cun inn hmun pakhat lawng a ngei kho lai tiah athanh.

Dothlennak chungah, vawlei chung chuak thilrii inn hmun lei hmun lo hmun le dum hmun hna cu phungning loin zuarh hlanh le peknak hna tuah a um lai lo tiah CDF-Hakha nih a thanh. Khuami hna nih lei hmun, lo hmun, tlanglo hmun le dum hmun hna cu ṭha tein a ṭuannak le hmun a ngeih bak konak a langhter khawh lawngah ṭuannak nawl pek a si lai. Cu bantuk in a langhter khawh lo ahcun chuh asi lai tiah an rak thanh. 2021 February 1 hnu cawkmi hmun pawl kong kha CDF-Hakha Council sinah chimh a si lai i chimh lo a si ahcun chuh a si lai tiah ral rin a pek. A cunglei langhtermi a zul lomi phu le minung cu fak ngai in a ziizut a si lai tiah a chim.