Breaking News: Monywa SAC Ralkap Gate Pakhat Kah A Ton Caah Ralkap 6 An Thi + Kahdohnak Thawng. Sagaing ramṭhen Monywa pawng Monywa-Mandalay lampi ah SAC ralkap check gate, Ma U gate cu PDF nih nihin August 15 zing sml 2:00 hrawng ah hriamhme le hriamngan he an kah caah SAC ralkap 6 hrawng an thi tiah theih a si. Naih tein kan kah hna caah SAC ralkap a tlawm bik 6 an thi lai tiah Chindwin Attack Force in ralkap pakhat nih a chim.

Minutes 45 chung hrawng kan i kap i SAC ralkap nih 40 mm le hriamngan he hriamhme he an kah hna nain PDF lei hliamhma pu mi le a thi mi an um lo tiah theih a si. Cu kahdohnak ah cun Monywa pengkomh Chindwin Attack Force Battalion 2, 3 le 4 in thiamhlei Commando ral kap Monywa The Boys, thiamhlei hlathlaitu phu Monywa Special PDF le Northwest Plains Revolutionary Forces-NPRF phu hna i bawm in an kah hna, tiah theih a si.

Mandalay Ramṭhen Matayar Peng Ah SAC Ralkap Bomb Puah An Ton Caah Ralkap 4 An Thi: Mandalay ramṭhen, Matayar peng Taungkan le Muang Oo khua pawng ah rallam a sialmi SAC ralkap pawl cu nizan August 14 ah bomb kan puahhnawh hna i, ralkap 4 an thi, tiah Natsu PDF ṭuanvo ngeitu nih a chim.

Nizan August 14 zing sml 8:05 ah SAC ralkap 30 hrawng cu hmunhma thianhhlimhnak an tuah lioah bomb lung 4 in kan puahhnawh hna caah ralbawi 1 telh in ralkap 4 an thi tiah achim chap. Cu bantukin Khin-U khua in Shwebo lei ah a kalmi SAC ralkap motor 4 cu, August 13 zing sml 9:28 ah bomb voihnih kan puahhnawh hna tiah Shwe Bo Defense Force nih an langhter.

SAC ralkap motor 4 lak ah a pahnihnak le a hnu bik a kalmi cu Shwe Bo Defense Force le King Peacock Defense Force nih bomb lung 8 in voihnih an puahhnawh hna. Ralkap a thi mi le aa hliammi an fehter kho rih lo, tiah theih a si. Mandalay, Shwebo, Myintgyina lam hi SBDF bomb ralkap phu le ṭangrual phu hna kan cawlcanghnak a si caah mizapi hna nih zan sml 7:00 in zinglei sml 5:00 chung ah nan umkal lai lo, tiah SBDF nih cathanh an chuah.