Yangon ah meithal hma in Mang Suan Khai a thi, a ruak bel an hmu rih lo! Yangon khua N. Okkalar-awine hrawng March 3 lio lamzawh mi hna Ralkap le Palek nih an kah hna lio ah Mang Suan Khai (kum 27) cu a phei (el) ah an kah i a konglam thei loin an um hnu. March 6 zaan suimilaam 9:00 hrawng ah a thi ti thawng an theih.

An kahka ah hin a upa phone a chawnh ta manh. “Ka phei ah meithal hma a um. Atu hi Palek motor ah an ka khumh cang,” ti vial a chim i phone a chiah. Sii-inn kip le thong-inn kip an kawl lengmang nain a hmu lo. A hnu March 6 zaan, N. Okkalar Sii-inn ah aho a si hngalhlo mi ruak a phan ti an theih i an vun hlat tik ah Mang Suan Khai ruak a si. A ruak cu a nulepa nih an hal hna tik ah “Sii-inn ah a um ti lo,” an ti. Khoika an kalpi ti hngalh a si lo, tiah kan theih.

Pehtlaihnak: Apa- U Maung Maung. Anu – Pi Nel Khan Cing. #Phone: 09-756107110, 09-763825760. No. 1169, Bopyao lam-1, 4 Block, East Dagon, Yangon. Credit: Chinworld & The Hakha Times

Relchih: Ramchung Mino hna, nan tei hrim hrim lai. Thil kal ning a hman tuk. Kum 125 chung miphun dang nih an kan pem/uknak chung in Chin miphun zalawnnak/ freedoms sulu pi a tlunpitu nan si lai. Chin miphun tuanbia a ttialtu nan si lai. Cucaah. CDM ahkhan rak ipaih viar ko u! India Cozah nih Kawl Ralkap a bawm naisai lai lo.

“Police a zaammi rak kan kua tthan u” an timi zong an kua naisai hna lai lo. Mizoram Cozah zong nih kanmah/ Chin Mino bawmh dingin ready an si. Chin State chung ah Ralkap a ummi zong CDM ah itel sawm hna u! A cheu cu itel an duh lai ka zumh. “Kan ral nan si lo. Mipi a vengtu, a dawtu nan si. Mipi caah nunnak a pemi nan si. Nan cung lei minung, Aung Min Hlaing pakhat Bawi ttuannak caah nan nunnak pek ding cu nan pam tuk, ti hna u. Facebook an hman ahcun Facebook zong in ca kua ve hna u.

Kawlram chung zong ah CDM an karh cuahmah ko. Police le Ralkap chung zong in CDM a tuahmi an karh tuk cang. Kan sungh cang tiah an von theih pah hnu ahcun Min Aung Hliang hi a ral bawi lila chung in CDM an tuah tak te lai. Nan tha chia hrim hrim hlah seh! Teinak ni a ra lio cuahmah ko hi! By Zasang Cinzah