Breaking News: Matupi Ah SAC nih Pastor Telh In Mino 9 Thongthlak Ding Le Rianhrang Tuan Ding In Nawl Achuak

Myanmar News

Matupi ah SAC nih Pastor telh in mino 9 thongthlak ding le rianhrang ṭuan ding in nawl a chuak. Chin ramkulh Matupi khuaah SAC nih tlaih mi Pastor pakhat telh in mino 9 cu aluancia May thla dongh le June thla zarhhnihnak ah thong saupi thlak ding in nawl achuak. Matupi khua ah CDF le CDM a tuahmi pawl tangka kholhtu nan si tiah an puh hna i tlaih a tongmi Pastor Kap Thang he tangka kuatnak rian a ṭuan mi U Aung Ko cu SAC  Ralkap nih June 13 ah rianhrang le thong kum 15 thlak ding in nawl an chuah tiah Matupi Times Editor nih Khonumthung Burmese ah achim.

Pastor le U Aung Ko cu Yangon lei in tangka kuatnak an tuahmi a um Mahka SAC ralkap pawl nih CDF nan bawmh hna tiah an tlaih hna. Hi Nawl an chuahnak ni kha fiang tein an langhter ko nain thawngpang a um lo caah a luancia ni tlawmpal ah khan a hnubik 2 cu kum 15 thong an thlak hna i a hmai ah nawl chuah cang a simi zong an um tiah kan theih tiah a chim.

Pastor Kap Thang hi Matupi peng, Chanpyan khua Gospel Church ah Pastor a ṭuan liomi a si i U Aung Ko hi Matupi khua Sanbaung sang ah tangka kuatnak a tuahmi asi. Pastor Kap Thang le U Aung Ko hna hi CDF/CDM pawl tangka an kan bawmh lo bantuk in CDF-Matupi he zong pehtlaihnak a ngei lomi an si tiah CDF-Matupi hruaitu pakhat nih a chim.

Matupi khua ah CDF he pehtlaihnak nan ngei tiah puh ruangah tlaih a tongmi mino 7 zong a luancia May 31 ah SAC nih thongthlak dingin nawl a rak chuah. 2021 August 20 ah tlaih a tongmi Matupi peng, Chanpyan khuate le Kalein khuate mino 6 chung in 4 cu May 31 ah rian hrang le thong kum 5, adang mino 2 cu kum 18 an tlin rih lo caah thong kum 2 thlak ding in nawl an chuah tiah theih asi. 2021 August 14 zongah tlaih a tongmi Matupi peng, Laungban sang in Pa Thung cu May 31 ah rianhrang le thong kum 5 thlak ding in nawl an chuah tiah theih asi. An zapi tein Matupi palik sakhaan ah an fim hna lio a si i a rauh hlan ah kawl lei kuat dawh an si tiah Khonumthung Burmese nih a langhter.

Leave a Reply