Breaking News: Malaysia Ah kal Aa Tim Mi Myanmar Mi 41 Thailand Ah Tlaih An Tong!. Malaysia Ah kal ATim Mi Myanmar Mi 41 Thailand Ah Tlaih An Tong! Phung ning lo in Malaysia ah rianṭuan dingin akal mi Myanmar ram mi 41 cu Thailand ram thlanglei Hatyaing peng komh ah Thai palik nih an tlaih hna tiah theih asi. Thawng theih ning ah Hatyaing peng komh rianngeitu Department of Immigration le Thai palik hna nih Myanmar ram mi pawl an i thuhnak ramlak ah an kawl hna i, atu bantuk an tlaih hna tiah theih asi.

Rianngeitu hna nih zankhuadei an bawh hna i June 5 chunhnu Sml 2 ah mawṭaw(pick-up) 2 ah aa thup mi Myanmar mi hna cu palik nih an tlaih hna, tiah theih a si. Tlaih a tong mi minung 41 chung ah cun pa 37 le nu 4 an si. Mawṭaw khaltu Thailand mi 2 zong tlaih chih an si. Mah Myanmar mi hna nih hin Malaysia ramri an phak khawh nakhnga mawtaw khaltu sin ah Bath 7000 cio an pek hna, tiah palik nih an chim. Hi Tlaih a tong mi hna cu palik sin ah an um rih i, phung ning lo in rian a ṭuan mi midang tlaih khawh an si nakhnga hlathlainak an tuah lio, tiah theih asi.

N. Korea In A Luang Mi Ti Ruangah South Korea Ah Harnak An Tong! S. Korea ram Imjin Tiva ti a lianh caah a pawngkam khualtlawng mi hna cu nizan July 5 ah ṭuanvo ngeitu hna nih an ṭhialter hna tiah theih asi. Atu bantuk ruahlopi in ti alianhnak aruang cu N. Korea ram mi Hwang gang tikhuah (Dam) pakhat in Ti an rak sah caah a si lai, tiah Ministry of Unification South Korea zung in ṭuanvo ngeitu nih a chim. North Korea ahhin a luancia ni tlawmpal ahkhan faak ngai in ruah a sur caah, ram chung ti lianh lai an phan caah Hwanggang tikhuah Dam an sah mi a si lai tiah zumh a si. South Korea lei nih, Dam ti sah lai ah cun meiceu in theihternak tuah hmasa ding in N. Korea an nawl nain N. Korea lei nih thawngthanhnak zei hmanh an tuah lo. 2009 lio zong ahkhan N. Korea nih Hwanggang tikhuah cu S. Korea lei theihter hmasa lo in an sah caah S. Korea mi 6 nunnak a rak liam.