Khuapau dohthlennak kumkhat leng chung ah Sagaing ramṭhen le Magwe ramṭhen a biapit biknak lam, 90% cu PDF nih an control khawh cang tiah NUG nih an thanh. Cu bia cu nihin June 21 ah media he tonbiaruahnak an ngeih ah NUG nih an chim mi asi. A thlithup kahdoh nak lawng si ti loin hmaitonh kahdohnak zong kan tuah khawh cang, tiah Press Secretary in U Nay Phone Lett nih achim. Cu bantuk ṭhiam cun Yangon Mandalay Pago ramṭhen zong ah SAC ralkap hna cu a thlithup in kah an si.

Cun ṭangrual hawi a si mi tlangchung hriamtlai KNU, KA, CNF le KIA zong nih ramkulh hmunkip cio ah a hlan nakin hmunram an control khawh cang tiah U Nay Phone Lett nih a chim. Monywa Peng Ah Pyusawhti Hruaitu Sin In Hmunhlat Zohnak Pakhat Le Taisawmh 6 An Hmuh: Sagaing ramṭhen Monywa peng MaYoeTawMyauk khua ah a ummi Pyusawhti hruaitu tiah theihmi cu a umnak inn ah hmunhlat zohnak pakhat le taisawmh 6 kan laak tiah Aung San Generation Monywa nih June 21 ah an thanh.

Thawng kan theih lecangka in tlaih ding ah kan kal nain amah cu kan tlai manh ti lo, SAC ralkap nih an pekmi thilri lawng kan laak khawh tiah Aung San Generation Monywa phu in ṭuanvo ngeitu nih a chim. June 21, chunhnu suimilam 12:30 ah thawng dik kan theihmi a um caah pyusawhṭi hna hruaitu U Myo Tinth cu tualchung hriamtlai phu nih a umnak inn ah tlaih ding in kan kalhnawh nain, kan phak hlan ah a hriamthil he a rak zaam, cang tiah a chim. Tualchung hriamtlai phu hna cu pyusawhṭi hruaitu U Myo Tinth inn ah minutes 30 hrawng zohfelnak an tuah hnu ah an kir ṭhan.

Aung San Generation Monywa nih cun hriamthil tlamtling in ngei hlah hmanh usihlaw mizapi cung ah phunkip in harnak a petu phu cu zei bantuk phu an si hmanh ah kan lehrulh hna lai, tiah an thanh. Aung San Generation Monywa nih a voi khatnak raltuk cawnnak cu ni 22 chung an ngeih i, June 13 ah cu training cu tlamtling tein an tuah khawh. Raltuk cawnnak ah cun minung 36 an i tel kho, tiah theih a si.

DPRA Nih M-79 Launcher Le 40MM Kuan An Ser Khawh Cang! Anti-Dictatorship People’s Revolution Army(DPRA) nih M-79 kutser laun cher le 40mm bomb kuan cu nihin June 21 ah tlamtling tein an serchuah khawh cang tiah rianngeitu sin in theih asi. M-79 launcher le 40mm bomb kuan pakhat caah 100,000 kyats a dih. 40mm kuan kan serchuah khawhnak tu cu a sau cang.

Atu kan serchuah mi hi cu kanmah ca zong ah ṭih a nunnak a um lo. Ral kan kah hna tik zong ah a puak lai ti hi 100% a fiang mi asi 40 mm kuan hi thlakhat ah lung 25 kan ser khawh i, a sau bik a phan kho mi hi meng khat tluk asi tiah DPRA in rianngeitu pakhat nih a chim. DPRA nih thlakhat ah rocket hme phun lung 20, 60 mm lung 30, bomb lung 20 le meithal zuun zeimawzat an ser khawh tiah DPRA thawngthanh nak in theih a si.