Yephyo Peng Ah Kum 19 Mino Pakhat Cu SAC Ralkap Nih An Thah! Tanintharyi ramṭhen Yephyo peng Kalonehtar khua ah umhmun a khuar mi SAC ralkap nih August 16 ah kum 19 mino pakhat Thant Zin Htwe cu an hrem hnuah zohchia ngaiin an thah tiah atu Dawei Information Center nih an thanh.

August 16 zanlei sml 4:30 hrawng ah Thant Zin Htwe cu sianginn lam a tan lio ah SAC ralkap nih an tlaih i an kah thah tiah tualchung mi hna nih a chim. Sianginn chung ah SAC ralkap pawl umhmun an khuar cu a theih lo caah atu bantukin an kah hi a si. A ruak cu kan la kho rih lo tiah tualchung mi pakhat nih a chim.

SAC ralkap 150 hrawng cu August 14 zinglei ah Kalonehtar khua pawng ah an rak phan i, khua chung ah umhmun an khuar. Cu ni zinglei ah umhmun a khuarmi SAC ralkap 100 hrawng tu cu Maykhani khua lei hoih in an kal. Kalonehtar khua ah ralkap 40 hrawng an chiah tak hna tiah theih asi. Sagaing ramṭhen Kanbalu peng Kotaungbo khua ah umhmun a khuarmi SAC ralkap nih August 18 zanlei ah hriamngan in an kah i, inn pakhat a tlak caah inn chung a ummi nu pahnih cu an nunnak a liam, tiah Kotaungbo Revolution KTB-R nih an langhter.