KNU Hmunram Tathon Kengkomh Ah Nikhat Chung Ah Kahdohnak Voi 3 A Chuak: KNU brigade 1 hmunram Tathon pengkomh ah June 13 nikhat chung ah kahdohnak voi 3 achuak tiah KNU Tathon pengkomh in ṭuanvo ngeitu nih achim. June 13, zinglei suimilam 5:00 luan hna hrawng ah Tathon peng, Pingneṭaw khua SAC ralkap sakhan cu KNLA brigade 1, battalion 2 le PDF phufonh nih an kahdoh hna i cu kahdoh nak ah cun SAC ralkap 4 an thih lengah 3 nih hliam an tuar tiah theih asi.

Chun suimilam 11:00 hrawng ah Kyaiṭhṭupeng le Bilin peng aa tonnak thir hleidonh pawng SAC ralkap camp cu KNL brigade 1 phufonh nih hriamngan he an kahdoh ṭhan hna caah kaphnih kahdohnak a chuak i, mithi le hliamtuar kong langhter a si lo. Chunhnu suimilam 2:30 hrawng ah Kyaiṭhṭu peng Kuku khua ah a lutmi SAC ralkap le KNLA brigade 1 phufonh kar kahdohnak a chuak ṭhan i cu kahdohnak ah cun PDF lei in minung pakhat nih hliamhma a tuar nain a hliamhma kong ah thinphan ding a um lo. SAC ralkap lei in 3 nak tlawm lo an thi lai tiah ruah a si.

Hmundang zong ah kahdohnak pehtlai in a chuak nain kahdohnak a chuahnak hmun le thihlonak a um le um lo fiang tein langhter asi lo tiah Taṭhon pengkomh in ṭuanvo ngeitu pakhat nih Than Lwin Times ah a chim. June 12 ni zong ahkhan KNU hmunhma Pha-an pengchung ah SAC ralkap kuttang um BGF le KNLA phufonh kar kahdohnak a chuak i, cu kahdohnak ah cun BGF lei minung 3 an thi i, 2 nih faak ngai in hliam an tuar tiah theih a si.

Watlat Peng Tamakone Khua SAC Ralkap Nih An Khangh I, Nu 5 An Tlaih Hna!: Sagaing ramṭhen Watlat peng, Tamakone khua cu nihin June 13 zaanlei Sml 4 tluk ah SAC ralkap nih luhhnawh in an khangh i khuami nu panga zong an tlaih hna, tiah tualchung mi nih Yangon Khat Thit media ah an chim. Nu hna cu khoika an kalpi hna ti theih a si rih lo.

SAC ralkap hna nih chunhnu Sml 2:30 ah Pinzin  khua in Tamakone khua cu hriamngan le hriamhme in kah hnu ah zanlei Sml 3 tluk ah cun phung ki sianginn ah umhmun an khuar colh. Cun zaanlei Sml 4 hnu in innlo an khangh hna, tiah theih a si. Khuami tam deuh cu a himnak hmun ah an zaam hna i, khuachung ah thilri arawkral mi zat cu fiang in theih si rih lo. Meiphalhtu an um lo ah cun a kaang mi le a rawk mi a tam ngai lai, tiah tualchung mi nih an chim.

Sagaing Ah Journalist Hlun Pakhat Tlaih A Tong!: Nihin June 12 zaanlei ah Sangaing khuapi Shwe Min Win sang ah a ummi Journalist hlun pakhat cu SAC ralkap nih an tlaih i, No.1 palek sakhan ah an hren tiah achungkhar le ahawile hna sin in theih asi. Tlaih a tong mi journalist pa hi U Ye Naing Swe asi i zei ruang ah an tlaih ti cu theih asi rih lo. Sagaing ramṭhen ah SAC nih anmah a doh kalhtu journalist hna cu an tlaih hna i, media ah a ṭuan mi poh cu ruahlopi in tlaih an si lengmang tiah Ko Ye Naing Swe chungkhar le a hawile nih cun an chim.