KhinU peng Ba U Khuami Minung 50 Leng Tlaih An Tong! Sagaing ramṭhen Khin U peng Ba U khua cu nihin June 23 zinglei ah SAC ralkap nih hriamngan le hriamhme puahpah in khuachung an luhhnawh i, khuami minung 50 hrawng an tlaih hna, tiah tualchung mi nih an chim. SAC ralkap 60 hrawng cu zinglei suimilam 3 hrawng ah khuachung ah an lut tiah theih asi.

Nizaan June 22 ah palik thah a tongmi an um caah rallam sial in SAC ralkap hna cu khuachung ah an luhnak hi asi. Ba U khuami pawl cu an zaam dih i, a zaam kho lo mi nu le ngakchia cu tlaih an tong hna atu ah cun khuachung ah luh ngam a si lo i, thawngpang kan theihmi zong a um lo. SAC ralkap cu khuachung ah an um ko rih tiah tualchung mi nih cun a chim. Ba U khuami tlaihkhih an tonnak kong ah SAC ralkap lei nih thawng thanhnak an tuahmi a um lo. Ba U khua cu nizaan ah palik thah an tonnak KanTit khua he naih tein a ummi khua pakhat asi.

Thawngdang Karen ramkulh Bilin peng Pawkhi khua pawng June 22 ah Bilin peng NLD party Chairman Kyaw Myo Min telh in minung 3 cu SAC ralkap nih an tlaih hna i, khuami pakhat an kah thah hna, tiah NLD party he naihniam mi hna sin in theih asi. Kyaw Myo Min NLD par ty chungtel Pan Myint Ko Ko Maung le khuami pakhat hna cu cycle pahnih in LayKaTey khua lei an kal lioah SAC ralkap he an i tong i an rak tlaih hna hi a si. An tlaih hna lioah SAC ralkap nih an kah hna i khuami pakhat a thi NLD party he naihniam mi pakhat nih achim.

Rian herh ah cycle in an kal. SAC ralkap he an i ton caah an tlaih hna. Khuami pakhat cu an kah thah, a dang 4 cu an thawng kan thei kho rih lo tiah a chimchap. Kyaw Myo Min cu 2020 ram pumpi thimnak ah Bilin peng ramkulh Hluttaw Palai No.2 in aa zuam i, teinak a rak hmu. Uknak lak hnu in SAC nih 505(a) in taza an cuai i, aa thupmi asi tiah theih asi.

Thawngdang Sa Lin Kyi Palik Sakhan Kahdohnak Ah SAC Ralkap 5 Nak Tlawm Lo An Thi. Sa Lin Kyi khua palik sakhan cu nihin June 23 in zing sml 2:30 hrawng ah PDF Guerrilla phu nih 120 mm lung 11 in kan kah hna caah an sakhan champheo a cim i, SAC ralkap 5 nak tlawm lo an thi tam ngai hliamhma an pu tiah PDF Guerrilla phu nih cathanh an chuah.

Cu palik sakhan kahdohnak ah PDF Guerrilla, Companny 2 le 4 i bawm in kan kah hna. Kanmah lei in a thimi le aa hliammi an um lo, tiah an langhter. Nizan June 22 ah Sa Lin Kyi, Moe Kyu Pin khua a khaangtu SAC ralkap pawl cu Salingyi Border Task Force ၊ Brother Defense Force le SaLinKyi PDF nih 60mn, 80 mm le 120 mm in kan kah hna tiah Salingyi Border Task Force – SBTF nih cathanh an chuah.

https://www.facebook.com/miphundawtu123/videos/738609547383675

Credit: The Chin Post. Adang State Counselor Aung San Suu Gyi Naypyitaw thong ah ṭhial a si. Hramhram in uknak a latu phu nih sualnak phunkip bunh in tlaih le tazacuai a simi State Counselor Aung San Suu Gyi cu June 22 ah Naypyitaw thong chung inn dang te ah kuat a si tiah theih a si. SAC nih hramhram in uknak a lak hnu ah State Counselor Aung San Suu Gyi cu khoika dah an chiah ti le amah pumpak zong nih khoika dah an ka chiah ti ka thei lo tiah a rak chim.

June 22 ahcun State Counselor Aung San Suu Gyi cu Naypyitaw thong chung a thar sakmi inn dang te ah umding in an ṭhial tiah biaceihzung he aa naihniam mi pakhat nih thawngzamh pawl sin ah a chim. Ram hruaitu pawl an bunhmi hna sualnak pawl cu Naypyitaw Council chung inn pakhat ah a hlei in biaceihzung an tuah i zohfelnak an tuah hna hi a si i June 23 thok in Naypyitaw thong chung inn thar ah ṭhial le zohfel asi lai tiah theih asi.