Kalaymyo, Aungwya (Aungzua) khuachuah ah a cangmi thil a si i meh hang a zuarmi Kawlpa nih Bike in Pi Bawi Nei kum 70 mi a pah i a nunnak a liam tiah theih a si. Hi konghe pehtlaiin Salai Kamte nih a chimmi cu” Bike in meh hang a zuarmi kawlpa nih Pi Bawi Nei cu a pah. Aungwya khua chuah, Phulmawi kalnak lampi ah a si. A pahtu pa nih bawmhnak a ka hal i ka phurhpiak. Aungwya in Tahan lei tlikpi dingin kan i timlamh cuahmah lioah a kan thih taak tiah” tiah a chim.

Salai Kamte nih a chimmi rihmi cu ” Pi Bawi Nei kan buaipi cuahmah lioah a pahtu Kawlpa cu a zam/tlau diam. Thinzung khuami, Nansawngpuh ah nupi ngeimi a si tiah theih a si. Tu ah palik zong an rak phan cang tiah” Pi Bawi Nei a pahtu kawlpa a tlaunak kong cu a chim.

A donghnak a chim rihmi cu ” Bike in Pi Bawi Nei pahtu cu a rak kir tthan i a konglam zong an ceihpiak cang. Ngaihchiatnak a tongmi chungkhar hna nih Ting 5 in an ngaihthiam i a kawlpa cu a lunglawm tuk hringhran i Vok pakhat thah a timhpiak tiah Khuabawi leiin thawng kan theih tiah” a chim.