Breaking News: Kawl Ram Le India Pehtlai Nak Lam 96% Adih Cang. India le Myanmar pehtlaihnak caah Lawngtlai district in Kawlram lei luhnak lam cawh lio mi Kaladan Multi Modal Transit Transport Project cu 96.21% a dih cang. KMMTTP lam hi 2010 October 12 ah hram thawk a si i, Mizoram chungah km. 99.830 lam cawh dingin budget rupees 575.96 crore tuak a si nain,zohthan a si hnuah lam cu km. 90.820 ah thumh a si i, budget estimate crore 677.20 ah a kai.

 

Lam hi fun( package) pathum ah then in tuan dingin timh a si i, 2016 June 11 ah dih dingin timh a si nain atu ah 4% hrawng a tang rih tiah theih a si. Mizoram Public Work Department (PWD) document ahcun KMMTTP lam cawhnak ah pumpak, bu ram a hrawh mi conpensation a haltu hna nih ram hi sq.km. 25,940.05 a si i, mah hi Mizoram pumhuap sq.km. 21,081 nak in sq.km. 4,859.05 in a kau deuh.

Lampi caah ram an lak/hrawh ruangah compensation kong hi Anti Corruption Bureau (ACB) nih hlathlainak an tuah mi a si i, 2020 kum donghlei ah khan an thil hmuh ning cu court ah a voi 2 nak chargesheet pek than a si. PWD chief engineer (highways) Lalruatkima nih vang laini sin ah a chim ning ahcun, KMMTTP cu 96.21% kan dih cang.Tuan ding a tangmi ah hlei pakhat donh ding lawng rian har mi a um cang.

Hlei 7 kan donh cang i, a tang mi cu lam kauh le dawhter deuh hna lawng a si cang. Revise estimate kan hal than lio a si i, Package 1 caah revised estimate cu cohlan a si cang i, package 2 le 3 an cohlan khawhnak dingah kan i zuam cuahmah lio a si. Revised estimate a herhnak a ruang cu lam cawh cia mi a cimh/minh tuk ruang le rulhnak/hrawh man liamh pin ah rian kan tuan khawh caan a tam ruangah a si tiah a chim. The chin post