Karenni ramkulh Hparuso peng Sulyiako khua pawng umhmun khuarmi SAC ralkap hna cu Central Special Operations KNDF le Loikaw PDF phufonh nih August 14 le August 16 ah an kahdoh hna. Cu kahdohnak ah cun SAC ralkap 4 an thi tiah theih asi. August 14 kahdohnak ah SAC ralkap pakhat athi i, August 16 kahdohnak ah SAC ralkap 3 an thi tiah Central Special Operations phu nih cathanh an chuah. Nawl ngeih nak latu SAC ralkap hna cu an hram cah tiang ṭangrual phufonh nih kan doh hna lai tiah Central Special Operation nih an thanh.

Yuangan Peng Ah Minung 3 Cu SAC Ralkap Nih An Khangh Hna! Shan ram thlanglei, Danu Self-administerd Zone hmunram chung ah hin  Yuangan peng Taeluh khua le Taung Ukhua kar ah August 17 ah miruak 3 mei in khangh mi cu kan hmuh tiah tualchung mi nih an chim. Mi ruak an hmuhnak hmunhma cu August 16, ah SAC ralkap nih an rak cawlcanghnak hmunhma asi.

Cun khuami cheukhat zong bia an hal hna ko tiah Taeluh khuami pakhat nih achim. Cu ka hmun ah cun August 17 ah meithal thawng theih asi zinglei i SAC ralkap an kal hnu ah minung ruak mei in khangh mi cu hmuh a si. An tai cung an khangh dih hna caah mizei an si theih asi rih lo tiah a chim.