Kalaymyo Ah Meithal Kah Thawng Le Hriamngan Puah Thawng A Thang! Nihin July 14, zaanlei suimilam 6:30 hrawng ah Kalaymyo khua chung Tahan ah kahdohnak a chuak, tiah Tahan sangchung ummi pakhat nih Delta News Agency ah a chim. Kalaymyo Tahan sang Nay Kya Taith pawng SAC ralkap hna cu ral an vennak hmun ah kah an tong i, minung 2 hrawng hliamh an si tiah a chim.

SAC ralkap nih hriamngan in an kah hna caah Tahan sang F group sianginn pawng ah ummi inn pakhat cu hriamngan nih a khen tiah theih a si. Kalaymyo nitlak lei Tahan sang i kahdohnak a chuah hnu tlawmpal ah Kalaymyo nichuahlei Tazin sang LanmaDaw lamkam ah nurse sianginn ah a ummi SAC ralkap nih lampi ah cycle he a kalmi cu an kah hna caah tualchung mi 2 hliam an pu tiah theih asi.

Tuzaan suimilam 8:30 hrawng tiang Tahan sang ah meithal kah thawng theih a si rih i, hriamngan puah thawng zong theih a si. Kalaymyo 288 in SAC ralkap motor 3 cu Tahan lei ah a rannak in a kal, tiah lamkam lampi ah ummi nih an chim. Atangleiah thawngpang dang kan rak peh chap lai.

Thawngdang Falam-Hakha Kahdohnak: Niruk chung ah Ralhrang 70 fai an thi cang Miphun Ralkap 1 nih nunnak pek, 9 an i hliam Sagaing ramthen Kalay in Chin ramkulh khualipi Hakha lei ah a rak kaimi SAC Ralhrang phu cu Falam in Hakha lei an chuak in ni 7 chung ah hin Hakha an phanh  khawh rihlo leng ah atlawm bik 73 tluk an thi cang tiah theih a si.

July 8 in 13 chung ahhin, voi 15 tluk miphun hriamtlai CNF/CJDC Special Force nih Ralhrang le an mawtaw run cu an kham hna nak ah atu CJDC in pakhat nih nunnak a pek i minung 9 nih hliam an tuar. July 8 ah kahdohnak chuah hram a thawk i Falam in Surbung Airport lei kai nak le Rih lei kainak ah kah aa thok hmasa. Hi a nikhatnak Falam khuapi lonhka ah voihnih an i kap i CNF/CJDC special force lei nih an tei deuh hna caah Hika kahdohnak ah a tlawm bik Ralhrang ralkap 15 an thi lai tiah kan theih.

 

Cun July 9 hi Taal khua kiangkap ah an CNF/CJDC special force le SAC Ralrang ralkap an i kap than abik in Bomb rap le Drone in thlakmi bomb an hman deuh. Hika kahdohnak ahhin, a tlawm bik ralhrang ralkap 3 an thi. July 10 kahdohnak Tlangzar le a kiangkap ahhin, voikhat an i kap. Hika zong ahhin, ralhrang 13 tluk an thi lai tiah upa lei sin in kan theih. A bik in mine-bomb cu Drone in thlak mi bomb hi an hman. Nain, Ralkap nih miphun ralkap lei nih ngeihmi Drone pakhat cu Drone kahnak meithal in an kahpiak hna caah a tla.

July 10 Tlangzar khua in an chuah ahhin, Drone pahnih hmang in an kah than hna tiah kan theih. A hlei fakkhun kahnak hi Ramthlo khua kiangkap ah July 11 ni ah a si. Miphun ralkap CNF/CJDC nih karceh in an kah hna caah a tlawm bik Ralhrang ralkap 30-40 kar an thi i, an bomb lawng si loin Sniper zong nih a hliam hna i, pahnih hi cu siniper kahnak in an thi tiah fehter khawh a si. Cun, ralhrang mawtaw 4 zong an kham. A dang mawtaw 2 hi rawk lak in tuah i, a kal kho lo ding in an tuah. Hitan kahdohnak ahhin, CJDC Special Force (Commando) lei pakhat nih nunnak a pek, hliamhma fak lo tuar zong an um tiah theih asi.