Kalaymyo, Myo Hlat Sang ah a um mi, Lairawn Post Zung cu 2020 June 23 zaanlei suimilaam 3:50 tluk ah a kaang, tiah kan theih. Hi Lairawn Post hi COVID-19 zawtnak ruang ah April thla thok in riantian an rak i din. Zung ah an hman mi Solar Battery in mei kaang hi aa thok, tiah Sang tuanvo ngeitu hna nih an chim.

Mei kaang ruang ah canamnak seh , Riso pakhat, Computer pahnih le catlap hna a kaangh chih. Meithat motor pakhat a ra i, suimilaam 4:10 hrawng ah mei an thah khawh. Lairawn Post hi Chin (Falam) in thawng a tial mi an si i, ni hnih ah voi khat an chuah. Falam ca in thawng a tial.mi lak ah catlap tambik a chuah mi an si. Ref: Zalen (The Hakha Post)

Caṭialtu: Salai Lairamthang

Ruah Chuk Cho le Thawngpang Neknawi. Kan hnu zarh cu Hringtu pale ni kan hman zarh a si nain Democrats pawl nih an ukmi state pawl ahcun ikahnak le ithahnak in khuaci an mui. Democrats state a simi, Chicago khua ah mino tete meithal in an i kap, tam ial hma an pu. Democrats state, Minneapolis khua ah meithal in voi 11 ikahnak a chuak i, fa pahnih a ngeimi patung pakhat a thi. Democrats pawl le minak ttanhtu, BLM pawl nih an laakmi Seattle khua sang pakhat, CHOP autonomous zone ah meithal kahnak a chuak i, minung pakhat an thah. Police nih bawmh an duh nain luhnak nawl an pe duh hna lo.

Democrats pawl nih an ukmi New York khua zongah New York Post nih a tialning ahcun kan hnu zarhte ni ahkhan suimilam pakhat ah meithal zuun khat tluk in ikahnak a chuak. Minung 24 an kah hna. Democrats pawl an tam nak hmun poah ah meithal kah, nau thah,nau hrawh le crime sualnak hi cu a rak tam deuh hrimhrim ko. Cucaah dai tein um a duhmi mirang pawl, mirum pawl le sikan ngeimi pawl nih cun an khua in an chuah taak lengmang hna.

Democrats pawl hi meithal a hua cem an si nain democrats pawl nih governor an sinak le City Mayor an tuannak khua ah meithal an control kho hlei lo. Meithal ikahnak a tam chinchin. Republican pawl hi meithal an uar, meithal a ngeimi an tam nain Republican nih an ukmi state ah meithal i kahnak le i thahnak a tlawm deuh ti a si. Sikan an ngei deuh rua.

Joe Biden le Donald Trump Debate. Democrats in President a cuh dingmi Joe Biden le President Donald Trump cu voithum tiang bia-elnak, debate an ngei lai. Avoi khatnak debate cu September 29, a si lai i, Indiana state, University of Notre Dame ah a si lai. Indianpolis um laimi nih cun itel khawh i zuam ding a si. Avoi 2nak debate cu October 15, ah University of Michigan, Ann Arbor khua ah si lai. Avoi 3nak debate cu October 22 ah a si lai i, Nashville khua, Belmont University ah a si lai. Joe Biden hi mi lunglo ngaingai a si caah democrats pawl nih debate ah a chuahsual lai ti an phang ngaingai. Trump le Republican nih cun voi tam deuh debate tuah an duh nain Joe Biden nih cun voi thum hmanh hi a tam deuh tiah a ruah ti a si.

US Nih Ramdangmi 525,000 An Rian An Dinhter Hna Lai. Coronanavirus ruangah US ah rianngei lo minung million 40 renglo an si caah US cozah nih ramdang in US ah rian a rak tuahmi minung 525,00 cu kan hnon hna lai tiah White house nih tuchun ah an chim. President Trump nih “American First ” ti bantuk in US mipi nih rian an ngah hlan lio cu ramdang mi kan au rih hna lai lo tiah a rak chim bal.