Thlanglei Kalay, Tayagone khuate, GTC sianginn chungah hmunhma akhuarmi SAC ralkap thazang 150 le PDF-Kalay karlak ah nihnih chung kahdohnak a chuak i SAC ralkap 7 nak tlawm lo an thi tiah theih a si. August 8 ah Tayagone khua in a rak chuakmi SAC ralkap cu chun sml 12:00pm hrawngah Kyun tiva le ni tlaklei Santha khua karlak ah PDF-Kalay battalion 3,6,8,12, le CDF-KKG nih an kah hna tiah PDF-Kalay nih a thanh.

Kahdohnak hi sml cheu hrawng arau i SAC ralkap 4 nak tlawn lo an thi tiah a thanh. Ninga a rauh hnu August 12 zinglei sml 11:00am hrawng ah Tayagone he meng 10 hrawng aa hlatnak Chaungkhuah ah SAC ralkap pawl an rak phan ṭhan i PDF phufonh nih an kah ṭhan hna. Kahdoh nak hi zinglei sml 11:00am-5:00pm tiang pehzulh in kahdohnak a fak i SAC ralkap a tlawmbik 3 an thi tiah a langhter. Kahdohnak a chuah ni August 12 zaanlei ah SAC ralkap nih Chaungkhuah khua chungah mipi inn 12 an khangh tiah PDF-Kalay cathanh chungah hmuh khawh asi.

Thawngdang Bago ramṭhen Yetarshi peng Sipithar khua lamtonnak pawng ah August 13 zinglei ahkhan Yetarshi PDF ralkap pahnih cu SAC ralkap nih an tlaih hna tiah theih a si. PDF ralkap pahnih an tlaih hna hnu ah Naypyitaw le Yetarshi PDF ṭangrual sakhan pakhat cu SAC ralkap nih an laak pin ah RPG zun khat telh in hriamnam le zen-kuan tam ngai an laak tiah PDF ralkap pakhat nih a chim.

PDF ralkap pahnih cu SAC ralkap nih an tlaih hna i cu hnu ah sakhan pakhat an laak. Sakhan chung ummi thilri zong SAC ralkap nih an laak chih. Cu thilri cu Naypyitaw lei in an kan bawmhmi asi tiah Yetarshi PDF ralkap pakhat nih a chim. Yetarshi PDF ralkap pahnih tlaih an ton hnu ah Naypyitaw PDF hriamnam le zen-kuan cu SAC ralkap nih an laak dih, tiah Naypyitaw PDF nih an fehter. PDF ralkap pahnih an tlaih hna hnu ah SAC ralkap nih Yetarshi peng tualchung mi kum 14 ngakchia pakhat zong an tlaih, tiah tualchung mi hna nih an chim.

KIA le PDF Nih SAC Ngeihmi Myanmar Beer, Dagon Le Andaman Gold An Thlet: Sagaing ramṭhen, Intaw ah SAC ngeihmi Myanmar Beer, Dagon le Andaman Gold Beer a phortu motor cu KIA le PDF ṭangrual nih an tlaih i, Beer cu an thlet dih, tiah Indaw Revolution-IR nih cathanh an chuah.

A luancia August 12 zing sml 11:30 ahkhan KIA le PDF ṭangrual phu hna nih Intaw-Kyawngkone lam ah chekhlatnak an tuah lio ah Mandalay in Intaw lei a kalmi motor pakhat nih a phorhmi Myanmar Beer bawm 180, Andaman Gold bawm 12 le Dagon Beer bawm 8 cu an tlaih i an thlet dih, tiah theih a si.