Japan Rammi Video Journalist Pakhat Cu Sualpuhnak Phun 2 In SAC Nih Taza An Cuai! Japan rammi video journalist le flim sertu pakhat cu sualpuhnak phun 2 in tazacuai asi tiah SAC nih cathanh an chuah. Japan rammi video journalist le flim sertu Toru Kubota leng ah Yangon ramṭhen South Dagon peng ah SAC ralkap uk duhlonak langhter in lamzawhnak a tuahtu minung 2 cu SAC ralkap nih July 30 ah khan an rak tlaih hna tiah theih a si.

Toru Kubota cu July 1 ah tourist visa in Thailand in Myanmar ram ah a rak lut. July 30 zaanlei ah South Dagon city mart pawng i minung 15 hrawng nih SAC ralkap uk duhlo in lamzawhnak a tuahlio cu vedio a thlak caah kan tlaih tiah SAC nih an thanh. SAC ralkap kut in tlaih a rak ton ka ah thlahpiak zau ding in Japan lei nih nawlnak an rak tuah, tiah theih a si. Toru Kubota cu rampi muichiattertu ti in section 505(A) in tazacuai asi tiah theih asi.

Thawngdang Chin ralkap nih Hakha le Thantlang kar um Timit hlei an hrawh hnu in hlei remh dingin ralhrang pawl an rak ra peng cu tikah chin pasal ttha hna nih khamin an i kap tawn. Atu ahcun ralhrang lawng nih tuah khawh ding si lo caah kawl lei in engineer pathum Timit hlei kongah Hakha an phan cang, Chinmi zong aa tel tiah Salai Williams Hlawnceu nih a Facbook cahmai ah a taar.

Thawngpang dang: Chin Ramkulh Paletwa Ah SAC Ralkap le AA Kahdohnak A Zual!: Chin ramkulh, Paletwa peng ah SAC ralkap le AA hna cu August 1 in 3 tiah pehtlai in an i kap, tiah theih a si. Paletwa khua thlanglei Kaladan tiva nichuah lei Na tlang lonh lam le Namaṭa khua pawng ah kahdohnak a chuak i, Battalion 289 nih kahdohnak hmunhma cu hriamngan in an kah, tiah Paletwa ummi pakhat nih a chim. Kahdohnak ruangah SAC ralkap nih Kaladan tiva thluan a kalmi vokkuanglawng hna cu chekhlatnak an tuah hna, tiah theih a si.

August 2 ah Ṭungmawa khua siangsangrun ah sianginn a kaimi hna cu, vokkuanglawng i cit in an ṭin lei ah SAC ralkap nih an kah hna caah kum 12 hrawng tang nga kaimi siangngakchia pa pahnih cu a hmun ah an thi. Siangngakchia pathum zong hliamhma an pu. Paletwa peng ah SAC ralkap nih a hlan lio tein ti lam le tlang lam an rak phih caah eidin phorhnak a har ngai. Atu lio zong ah kahdohnak a zual i, Paletwa khuami hna cu eidin le a dangdang thilri an har ngai, tiah theih a si.