Hramhram uknak thla 16 chungah SAC ralkap nih mipi inn19,000 hrawng a khangh Hramhram in uknak lak a si hnu thla 16 chungah SAC ralkap pawl nih akhangh ruangah mipi inn 19,000 hrawng akaang tiah Data for Myanmar nih June 7 ah athanh. Atu bantuk mipi inn khangh piaknak hi hmun 400 lengah SAC ralkap nih a buar tiah Data for Myanmar khawmhmi cazin ah hmuh khawh a si.Peng le ramṭhen 10 ah SAC ralkap nih mipi inn khanghpiaknak a buar i a tambik khanghpiak a tongmi hi Sagaing ramṭhen asi.

Magway ramṭhen, Chin ramkulh, Kayah ram, thlanglei Shan, Tanintharry, Mandalay, nitlak lei Bago, Karen, Kachin ram hna zong khangh piak an tong ve. Sagaing ramṭhen ah inn 13,840 khanghpiak a si i Magway ramṭhen ah inn 3,000 leng, Chin ramkulh ah inn 1,300 leng, Ka yah ram ah inn 400 leng in a tambik khanghpiak mi peng le ramṭhen an si. SAC ralkap pawl nih 2022 April le May thla chungah mipi inn tambik a khanghpiak hna tiah hmuh khawh a si. Data for Myanmar cazin ning ahcun 2022 April le May thla 2 chung lawngah inn 1000 leng khanghpiak a si tiah hmuh khawh asi.

Thawngdang Kachin ramkulh Shweku peng Pankhawyan khua SAC ralkap hmaisuang sakhan pakhat cu June 5, zinglei ah KIA nih luhhnawh in an laak tiah theih a si. Cu SAC ralkap sakhan cu KIA brigade 8, battalion 5 nih kadoh in an lak khawh tiah tualchung mi nih an chim. KIA brigade 8 battalion 5 hmunram ah SAC ralkap hna nih sakhan an ser caah atu bantuk in kan kah hna i an sakhan zong lakpiak an si tiah hi theih asi. Cu sakhan laaknak kong he pehtlai in KIA nih cathanh an chuahmi cu a um rih lo. Kachin ramkulh ah KIA le an hmunhma ri a lonh tu SAC ralkap karlak ah nitin ngawt in kahdohnak achuak tiah theih asi.

Thah-dan Pekmi Le Thih Hlan Lo Thongthlak Ding In Biaceih Mi Minung 209 Tiang An Phan Cang: SAC ralkap nih hramhram uknak a laak kumkhat le thla thum chung ah SAC ralkap uk duh lo langhter in cawlcangnak a tuahtu hna cu tlaih in a sangbik dantatnak, thih-dan le thih hlan lo thongtla ding in biakhiahnak tuahpiak a tongmi cu minung 209 tiang an phan cang tiah ISP Myanmar nih nihin June 6 ah an thanh. hih-dan pek mi le thih hlan lo thongthlak ding in biakhiahnak tuahpiakmi hna chung in Yangon ramṭhen North Okalapa peng cu a tambik an si i, thih-dan pekmi 52 le kum 12 chung thongthla ding in biakhiahnak tuahpiakmi an tam tiah theih asi.

SAC ralkap nih nawlngeihnak an laak hnu ah thih-dan pekmi hna chungin U Jimmy, U Phyu Zay Ya Taw, U Hlah Myo Aung le U Aung Tu Rah Zaw hna cu a voikhatnak hri-awh ter ding in timhtuah a si, tiah June 2 ah SAC ralkap thawng thanhtu phu in hruaitu pakhat nih a chim. Hi kong he pehtlai in NUG le ramkip nuhrin covo lei rianṭuantu phu hna nih duhlonak an langhter.