Breaking News: Hproso Kahdohnak Ah SAC Ralkap 10 Nak Tlawm Lo An Thi, Hriamnam Tam Ngai Chuh An Tong. Hproso Kahdohnak Ah SAC Ralkap 10 Nak Tlawm Lo An Thi. Hriamnam Tam Ngai Chuh An Tong. Karen ramkulh, Hproso peng ah June 10-13 tiang kahdohnak a zual caah SAC ralkap 10 nak tlawm lo an thi. Hriamnam zong tam ngai kan laak tiah KNDF Battalion 4 nih catthanh an chuah. June 10-13 tiang ah Hproso peng DawNgeHku le HtiPawSukhua pawng ah KA KNDF/B-02၊B-04၊B-08၊B-15 ṭangṭi phu le SAC ral kap kahdohnak a chuak.

Nikhat ah sml 3 chung hrawng an i kap i, SAC ralkap 10 nak tlawm lo an thi hliamhma pumi zong an tam.  Ṭangṭi phu lei in hliamhma pumi an um ko nain thinphan awk a um lo. SAC ralkap an hriamnam zong an laak tiah theih a si. Atu lio cu kahdohnak a zual caah Hproso peng kahdohnak hmunhma ah ahohmanh kal rih lo ding in KNDF nih mizapi ralrin an pek hna.

Thawngdang ZaLun Khua Palik Camp In Palik 2 Le Palik Bawi Chang Hriamnam He An Zaam. Ayeyawaddy ramṭhen Hintarta pengkomh Zalun khua palik camp ah rian a ṭuanmi palik bawi chang le a kuttang palik 2 hna cu June 11 zanlei ah hriamnam he an zaam tiah tualchung mi hna sin in rak theih asi. Zanlei ruah a sur tuk lioah CDM tuah ding in an zaam. An min le an kong lam cu himnak ca ah ka chim lai lo tiah palik he naihniam mi Zalwin khua um pakhat nih a chim.

June 11 zanlei in an zaam ni thawk in SAC ralkap le palik pawl nih an kawl hna tiah a chimchap. Palik 4 a zaam mi hna kong he pehtlai in Hintarta pengkomh palik bawi hna nih Zalun khua chung ah chekhlatnak an tuah tiah palik he naihniam pakhat nih achimnak in theih asi. Mah vial hi kan theih hngalh mi cu asi i adang kan theih hngalh mi um cun kan i zuam than lai.

Thawngdang A Chungkhar Tlaihpiak A Ton Caah Sihni(Lawyer) Nu Pakhat Amah Le Mah Aa That! A Chungkhar Tlaihpiak A Ton Caah Sihn (Lawyer Nu Pakhat Amah Le Mah Aa That! Mandalay ramṭhen Pathein peng Ong Chaw khua ah achungkhar ralphaw ah SAC ralkap nih tlaih piak a tong mi sihni nu pakhat cu zusii(pesticide) ding in amah le mah aa that tiah theih asi.

Hi sihni nu hi Ma Phyo Phyo Khine tiah auh mi a si i, kum 29 mi a si. SAC uk duhlonak langhternak le Pathein peng lamzawhnak pawl ah aa tel ve ti in June 8 ahkhan SAC ralkap nih tlaih ding in an kawl nain hmuh lo caah inn i a ummi a ṭapa le a naunu tu cu an tlaih hna i, tukvelh pah in an kalpi hna tiah theih asi. Cu hnu ah a ṭapa le a nau nu cu ni 4 chung a pehtlaih khawh ti hna lo caah June 12 ahkhan amah le mah aa that! Ma Phyo Phyo Khine hi PDF pawl a bawmhchanh hna tiin SAC ralkap nih an puh fawn tiah tualchung mi hna sin in theih asi.

Thawngdang Pastor pakhat nih a ka sik! Hey Bik, ziah pastor nih kan ram dothlennak thazaang peknak bia na chim ve lengmang? Pastor le khrihfabu cu ramkhel kong ahcun dai tein kan um awk si ko lo maw? a hun ka ti. Kei: Tutan kan Chin ram dothlennak hi keimah hmuhning ahcun ramkhel rian (politic) a si lo. Ramkhel ahcun nawlngaihnak i cuh, uknak tthutden i cuh a si.

Tutan hi, nawlngeihnak kan i cuh lo; uktu tthutden zong kan khelmi a si lo. Kan miphun hawi nunnak kan ven le kan biaknak rawhralnak in khamh kan timh tu a si. Nawlngeihnak kawlmi (politician) kan si lo. Minung nunnak chanh le venhim aa zuam cuahmahmi (rescuer) tu kan si, ka hun ti.

Pastor lo hmanh nih mipi nunnak chanh chuah ding in, an nunnak pek tiang in an ttuan ahcun ziah pastor chinchin nihcun kan ti khawh tawk lamkip in pei kan ttuan awk a si cu, tiah ka ti. Si ee, mi pakhat mei nih kangh sehlaw chanh chuanhnak dingah, kan nih cu pastor kan si, kan nih khrihfabu kan si, kan ti ngam ttung lai lo. Khrihfabu le pastor ko cu pei mei kanghnak in a luat khawh nakhnga, chanhchuah tu kan si deuh hnga cu..

Cu lawng hlah, pastor pa kha a inn pa pa nih ra riangmang in zei ruang lo ah a inn khangh piak ding in mei tom he rak pawhhnawh sehlaw, kei cu pastor ka si, tiah maw khaam tim loin a zoh sawh ko hnga? A zoh sawh kho lai lo; pastor cheukhat nihcun “an inn a khangh khawh lo nak ding a si phot ahcun lungtum hmanh in kan cheh lai”.

Na nupi tlaihhrem ding in na innpa pa nih nam he in pawh hnawh sehlaw, kei cu pastor ka si caah tiah dai tein maw kan nupi a tlaihrem lio cu kan zoh hnga? Si hlah ee pastor si thawng ah cu bantuk minung cu a herh ahcun lung zong in ta kan cheh ko lai. Mah ngamh tawk le hazawh cung vial ah kutzan ngai i tei khawh ding ah ruah lomi ralhrang cung vial i thinsau ngai hi a taktak ahcun ralchiat bia a si ko!

Bible nih nan ral va daw hna u, a timi hi thah an kan timh le khangh dih an kan timh zongah nanmah le nanmah i veng hrimhrim hlah u, an in that ko hna seh, tinak a si lo. Cucaah tutan kan miphun nih kan tonmi hi ramkhel thutden i cuh sawhsawh a si ti lo; khangh le thah dih a kan timtu ralhrang hna kut in kan i vennnak te khi a si ko caah kan ti khawh tawk cio in kan i tel dih ding a si ko, tiah sau nawn in ka hun leh. Lawmhnak he, Hram Bik Lian