Breaking News: Hakha khuachung ah COVID-19 lunghrinh mizaw minung pathum hmuhchap a si Chin Ramkulh, Hakha khuapi chung ah COVID-19 lunghring mizaw minung pathum sin in hmuhchap a si tiah thawng kan theih. Hi kong he pehtlai in Hakha sii-inn uk Dr. Mang Biak Kung nih, “Atu minung pathum hna hi Yangon in a rak tlung mi an si. Hakha an phaak le cangka in Na-ta-la sianginn ah erhkhumh an si. Atu hi Hakha i kan chek hna nak ahcun zawtnak hmuh an si. Zawtnak hmuh an si mi hi Mandalay lei ah kan kuat hna lai i anmah nih Confirm an rak tuah hna lai,” tiah The Hakha Post ah a chim.

Atu Hakha i zawtnak hmuh mi minung pathum hna hi Yangon in a rak tlung mi pa pathum an si. 2020 October 17 lawng ah Chin Ramkulh chung COVID-19 mizaw thar Falam ah minung 4, lunghrinh mi minung pakhat le Tonzang ah minung 2 hmuhchap an si. Atu lunghrinh mizaw minung pathum hna cu Hakha sii-inn ah chiah an si tiah thawng kan theih. Credit: The Hakha Post

Relchih>>>>Tulio cu election lai a si caah i soisel le i thangchiatnak lawng tein FB cahmai a khah lio caan a si caah ka ca arel tawtu hawile caah thawngpang neknawi tete caan ka ngeichunh te ah ka van in dangh hna. President Donald Trump le First lady Melania Covid-19 in an zawt lio ah khan an fapa, Barron zong positive a rak si ve. First lady Melania nih “ ka fapa, Barron Covid-19 in a zawt lio kha ka chan chungah ka lungretheih bik caan a si tiah a chiim. An fapa a dam lo cu first lady Melania nih a chiam hnu lawngah mizapi nih theih a si. Atu cu an pathum in negative an si dih cang.

Democrats Presidential candidate Joe Biden nih election campaign a tuahnak I bia a chim lio ah Senator Mitt Romney min a philh caah a lung a tlau tiah minung tampi soiselnak a tong than. President Trump nih “Joe Biden hi “ Dementia” timi zawtnak ngeih dawh a si ko, President si dingah a tlak hrimhrim lo” tiah a chim. Dementia zawtnak cu lungloh he a pehtlaimi thluak lei dam lonak a si an ti. Obama President a si lio ah Obama doctor a rak tuanmi, Ronny Jackson nih Joe Biden cu a thluak lei cawlcanghnak a that lo caah US president si dingah tlin dawh a si lo” tiah nizan ah Washington Times ah a chim. Mental capacity le cognitive ability a bau tiah a chim.

New York Post nih Joe Biden fapa, Hunter Biden le Ukraine gas company Burisma CEO Pozharskyi a thli tein ca an I kuatmi email an phozar mi cu Twitter le Facebook nih mizapi hmu kho lo ding in an tuah caah Twitter CEO Dorsey le Facebook CEO Mark Zuckerberg cu senate I biahal dingah Senator Ted Cruz le Senator Lindsey Graham nih timhtuahnak an ngei. Social media platform hna nih political party cungah thleidan le ttanh hlei an ngei le ngeih lo, zulh phung an zulh le zulh lo biahal dingah auh dawh hna an si. Mah email cu FBI le CIA zong nih hlathlainak an tuah lio a si caah Joe Biden caah tawngchia ngaingai a si. Joe Biden fapa nih Delaware I an umnak pawng ah a computr labtop a rawkmi a serter hna nak in a email kuatmi pawl hi an hmuh ti a si.

Joe Biden fapa Hunter Biden nih apa, Joe Biden Vice President a tuan lio ah a nawlngeihnak hmang in Burisma gas company caah Ukraine cozah bawmhnak tlaih piak chung ding in Ukraine cozah pressure a pek maw pe lo timi hi President Trump le Republican party pawl nih theih an duh ngaingai mi a si. Hunter Biden cu zeibantuk theih hngalmi a ngei lo nain Burisma company nih thla khat $50000 renglo thla hlawh an pek ti a si. Joe Biden nih mah bantuk a tuah taktak ahcun criminal case in tazacuai khawh a si. Joe Biden fapa nih hin Tuluk he zong he a pa Joe Biden min hmang hi sipuazi a tuahmi um dawh an si an ti.

African evangelicals khrihfa pawl nih hin President Donald Trump nih teinak a hmuhnak ding caah biatak tein thla an cam ti a si. A hlei in Nigeria le Kenya ko hi an zual an ti. Mah hna ram hnih hi Africa ram ah khrifa an tamnak ram a si. Africa pastor pawl nih hin Obama nih president a tuan lio ah Africa ram ah Liberal agenda tam tuk a ronh hna caah khrifa tampi an lung a rak rawk, mah ruangah Africa ram ah Donald Trump hi a lar ngai I, biatak tein thla an cam piak ti a si. Africa ram khrihfa pawl hi same sex marriage le abortion a hua ngaimi an si caah atu bantuk in Trump an dirkamhnak a si tiah BBC nih a tial.

Pew Research Center nih a hmuhning ah US mirang khrihfa hna nih Donald Trump cu Joe Biden nak in an duh deuh tuk ti a si. Mirang khrihfa 78% nih Donald Trump an duh lio ah Biden cu mirang khrihfa 17% lawng nih an uar ti a si. Biden a uarmi cu minak le mirang liberal khrihfa deuh an si tiah Pew nih an kherhhlai ning le an hmuhning an phuan. Salai Lairamthang