Hakha Campaign For Justice nih Mizapi Sin Ah Kahdohnak Kong He Pehtlai In Theihternak Cathanh An Chuah A luancia August 6 ahkhan SAC ralkap pawl nih an umnak horkuang cu chuahtak ngam loin hriam ngan puah in an i hrocer. SAC ralkap hna cu chin ralkap hna nih drone hmang in voi 3 tiang bomb an thlakhnawh hna caah SAC ralkap hriamhma tuar an tam lengah sniper kahnak in SAC ralkap pakhat an hrilh. August 7, ah SAC ralkap lei nih Chin ralkap hna cu voi hnih an nam hna i, Rungtlang lei in hriam ngan voi 15 puah in an rak bawmh hna. Fak ngai in kap hnih kar kahdohnak a chuak.

Chin ralkap sniper kahnak in SAC ralkap 2 an thi ṭhan 3 nih hliamhma an tuar. Chin ralkap lei cu an him. Nihin, August 8 ah Palik sakhan thlang SAC ralkap nih umhmun an khuarnak sianginn le cazinsit-zung cu zinglei suimilam 7:06 ah Chin ralkap hna nih an kah i SAC ralkap 2 hliamh an pu. Chin ralkap kan him i Drone hmangtu le bawmtu nan cung ah kan i lawm tuk tiah Hakha Campaign For Justic nih tuni August 8 ah an thanh.

Thawngdang Khah ’88 Buainak Kum 34 Tlin Camtuak Ah Hakha Palik Sakhan Ah Meithal Thawng Athang! Chin ramkulh khualipi Hakha Pyidawthar sang palik sakhan ah puahkehnak a chuak tiah theih asi. Hakha ummi pakhat nih Nihin August 8 zing sml 7:15 hrawng ah palik sakhan kah a tong. An kah caan cu a sau lo tiah The Chin Post ah achim. August 7 zan sml 8:00 in 9:00 karlak ah bomb thawng a thang ngai. Nihin zinglei dei hlan zong ah bomb thawng cu voi tam ngai a thang tiah a chimchap

Nihin cu Dawr khar dih u an ti caah kan khar kan khar, tiah Hakha dawr ngeitu pakhat nih cun a chim. Kannih hi dawr khar u ti thawng cu kan theih ko nain kanmah pumpak cu an kan chim lo. Kan khar hnga maw kan i laklawh ngai. Midang an khar dih ahcun kan khar ve lai tiah Hakha dawr ngei pakhat nih cun The Chin Post ah a chim ve.

Ne Win chan lio kum 1988 ahkhan democracy dirhkamhnak ruangah rampi buainak arak chuak. Nihin cawn nikhat ni hi ’88 buainak achuah kum 34 nak asi. ’88 buainak ah khan ralkap nih nawlngeihnak an lak i, ahnu kum 23 chung uknak an tlaih. 2011-2021 tiang Myanmar ram cu National League For Democracy(NLD) hruainak tang ah democracy muisam a vun keng nain ralkap hruaitu Min Aung Hlaing nih 1 hnu February, 2021 khan nawlngeihnak a lak ṭhan.