Breaking News: Hakha ah Meithal Voi Tam Nawn Apuak! Mipi An Lautuk Cang Um Awk An Hngal Tilo. Chin ramkulh khualipi Hakha ah Sept 4, tuzan 11:00-11:45 pm hrawng tiang mei thlai tam nawn a puak. A puahnak hmun hi an chimning aa dang cio. Cheukhat nih meithat zunglei ah an ti, cheukhat nih Economic bank hrawngah an ti, cheukhat nih suhpawng zung pawngah an ti. Hmunkhat lawngah si loin hmun hnihthum ah a puak tiah zumh a si.

Min langhter a duh lomi pakhat nih cun Meithal thawng cu a thang taktak, a tlerh bak in a kan tlerh dih tiah a chim. Cheukhat nih ralhrang anmah le anmah an i kap tiah an chim, cheukhat nih an i hrocermi a si lai an ti ve. The Chin Post nih cuticun a si tiah fehter khawhmi kan ngei rih lo.Meithal nih cun minung umnak inn zong a khen len i kuanfang zong inn chungah a tla tiah theih a si. Hakha khuachung ummi vialte lungretheih le thinphang in an um. Thlacamnak in bawm cio hna usih.

Thawngdang Kawlram chaklei hawikom hriamtlaibu 3 a si mi AA, MNDAA le TNLA hna nih covid le kahdohnak ruangah Kawlram mipi harsatnak ruah in ralkap cawlcanghnak vialte ngol cio dingin nihin September 4 ah cathanh an chuah. Cathanh nih a langhter ningah ralhrangbu nih February 1 ah rampi uknak a lak hnu dai tein duhlonak a langhter mi hna cu ralhrangbu nih an thah hna, an tlaih hna ruangah ramchung hmunkip meithal a puah.Kahdohnak zong a zual.

Kawlram chung covid-19 zawtnak ruangah mipi nunnak tampi a liam, eidin, chawlehnak zong harsatnak tampi an ton pin ah ramchung hmunkip ah kahdohnak ruangah mipi nih harsatnak fak piin an in. Ralhrangbu nih thazaang tampi an i chap, hriamngan in khua an kah, mipi an tlaih hna, an thah hna ruangah kahdohnak a karh chin lengmang mi a si.

Cucaah, covid-19 runvennak kongah pawngkam ram le vawleicung covid runvennak phu hna he tuanti ding le mipi nih atu nakin harsatnak an ton ti lo nak ding caah rianngeitu vialte nih lam kawl cio ding le mipi harsatnak a pe khomi ralkap cawlcanghnak vialte hrial le dinter dingin pehtlaihnak a ngei mi bu vialte hna sin ah kan in forhfial hna tiah cathanh an chuah.