Hakha ah Hmawngtlang khuami hri awhnak in a thi mi Update. December 15, zinglei suimilaam 7:00 hrawng ah Hmawngtlang khuami Pu Sang Tha Lian cu Hakha sii-inn pawng ah hri awhnak in a thi, tiah kan theih.

“Amah hi nupi le fa zong a ngei mi a si. Hakha Dawrhlun Kuattit ah khua a sa mi an si. Anih hi zu a ding pah mi a si an ti. Sii-inn ah an chiah i thlalangawng zong a thongh i a kuai. Tuanvo ngeitu nih an va zulhdawi tik ah atu bantuk in hri in aa awh hi a si. Amah hi kum 32 a si,” tiah Health Concern Volunteer Group (HCVG) in tuanvo ngeitu Pu Cham Hrem nih The Hakha Times ah a chim.

Amah hi Hakha ah khuasa an si bantuk in a nulepa zong an rak phan cang. Nihin December 15 ah hin a ruak an vuicolh ko lai, ti zong Pu Chan Hrem nih a chim fawn. Source: The Hakha Times

The Hakha Post: Breaking news: Hakha, Keitheibo sang sii-inn quarter pawng thingkung ah mi zei ti hngalh lomi pa pakhat awktun awknak in nunnak liam. An hmuh ning kong he pehtlai in,”Ngakchia nih cep an veennak ah an hmuh. Aa awknak hi a ke nih vawlei a tongh. Cun, kawl le lai a si an hngal rih lo” tiah The Hakha Post ah a chim.

A ke zong thi a chuak i atu hi Palek le rian ngeitu hna nih zohfelnak tuah lio a si.
Cun, Palek pakhat nih, “Aruak zohfelnak kan tuah tik ah a kehlei baan ah sii chunhnak hma a um. Sii-inn ah dam lonak in a ummi zong a si kho” tiah a chimchap.

Thawngpang dang rak rel chih uh:Hakha ah tender a sok mi Tedim pa positive a si Hakha a umkalnak minung quarantine an chiah hna. Hakha ah tender sachoh minthut ah December 10 ah a rak ra mi Tedim pa cu COVID-19 positive a si ca ah December 12 zan ah Tedim sii-inn ah an chiah i, Hakha a umkalnak zung, dawr le minung 19 December 13 ah quarantine ah an chiah hna.

Hi kong he pehtlai in Chin Ramkulh Ngandamnak Zung in Dr. Zing nih “Hi pa hi positive a si ca ah December 12 zan ah Tedim sii-in ah an chiah. Hakha na umlio ah khoikadah na kal tiah amah kan chawnh i NaTaLa, Aakhun zung, Ayeyarwady bank hna ah ka kal tiah a ti. Cucaah a umkalnak zung he a pehtlai mi minung 19 cu December 13 ah Quarantine ah kan chiah hna. Hakha a tlunnak inn cu Hakhathar Myanmar Kaido hmai ah inn an hlang i an umnak hi an hlan mi a si i kan va zoh nain an um ti lo a lawng cang,” tiah The Hakha Times ah a chim.

Hi kong he pehtlai in Hakha Town Coffee dawr riantuantu pakhat nih “Mah positive a si mi pa kha kan dawr ah thil ka caw hna a ti ca ah kanmah zong minug 6 atu hi quarantine ah an kan chiah ve,” tiah The Hakha Times ah a chim.

“Hi zawtnak hmuh mi pa hi, tutan tender sok lio ah Hakha i a rat le rat lo hi cu kan hngal lo. Asinain Tedim le Tonzaang lei hi Kalay in a rak tlung mi hna quarintien luhter an si lo ca ah zawtnak ngei mi a dang zong um khawh an si. Cun, kanmah Hakha zong Kalay in a rak tluung mi hna hi quarintine ah lut hmasa loin a thli in a tlung mi an um len tiah kan theih. Cucaah zeiti a si hmanh ah ralrin cu kan hau ko,” tiah Dr. A Zing ing nih a chimchap.

Hi kong he pehtlai in Hakha Sii-inn uk Dr. Mang Biak Kung nih, “Hi zawtnak hmuh mi pa hi tutan Hakha ah tender sachoh minthut a rat hlan, Tender sok lio ah rak rat khawh zong a si. Asinain a konglam fiang kan thei kho rih lo,” tiah The Hakha Times ah a chim.

Hakha khuachung ah COVID-19 zawtnak runvennak ca ah dinei dawr kharter an rak si nain, December 13 in dawr onter an si tiah kan theih.  Hakha khua ah quarantine an chiahnak hna cu Hakha University sianginn, Ingdwinhmu sianginn, TTI sianginn le NaTaLa sianginn ah an chiah hna tiah kan theih.