Georgia Secretary Of state Brad Raffensperger nih Georgia ramṭhen thimfung cu rel ṭhan a si lai tiah thawngthanhnak a tuah. Thimfung cu seh (machine) hmanh in rel a si lo, kut bakin rel ṭhan a si lai tiah cacawn nithumni ah thawngthanhnak atuah.

Trump caah cun thawngpang ṭha taktak a si ko cang hih. Ruahchannak zong ahung tam khun. Georgia ramṭhen thimfung (vote) cu a thar in rel ṭhan a si lai tiah Georgia Secretary Of State Brad Raffensperger nih cun a chim.

“Georgia ramṭhen 97 ah Donald Trump cu Joe Biden ih thimfung 14,111 tluk hrawngin a tei i a tlawm deuh. Trump zong a team pawl nih thil dik an kawl cuahmah lio a si. Cun, thimfung dik (Legal vote) paoh paoh cu rel ṭhan dih a si lai,”tiah a chim.

Georgia Secretary Of State Brad Raffensperger nih,“Hmaizarh chungah result hi chuak kho seh law ti hi Trump lei nih cun an duh. Asinain, November 10 or 20 hlan ah cun kan lim kho lai lo. Cucaah November 20 hrawng ahcun result hi a chuak kho te ko lai,”tiah a chim.

Donald Trump caah ruahchannak a um ṭhan ti khawh a si cang. Aruang cu George ramṭhen ahhin electoral Vote 16 fai bak a um. Cun, State cheukhat ah thimfung an langhter khawh rih lomi tete zong an um. Trump team lei zong biatak tein an cawlcang ve cang. Cucaah, George cu kut tein rel ṭhan siseh tiah an tinak hi a si. Chirhchan: CBS News|Dailymail

US Thimnak kong thawngpang dang rak rel chih;“Vote kongah dehhlennak a um lo,” tiin US pumpi ah ummi Election Official nih an chim. Tutan president thimnak ah dehhlennak a nehnang a um lo, tiah state tampi chung i party pahnih ning ai awhtu election officials pawl nih an chim.

“Kan election hi Trump sinin an kan firpiak. Cucaah Biden teitu ah nan ti mi hi kan cohlang kho lo,” tiin amah President siseh, a cozah riantuantu hna siseh, congressional Republicans si hna seh, cun right wing mipi tampi nih kan hnung vialte cu an au.

Tutan election ah vote tam taktak a tla, cun pulrai zong a um ko nain, tluangtein hlawhtlinnak a um, tiin ram pumpi ah tuanvo ngeimi election officials pawl nih an chim.

“Election kongah lihfangfak in thil tawn hi minung nih ai ti khawh sazia te a si. Khat le khat i congawihnak, bia diklo thanhnak hei ti bantuk zohdawhlo thil vialte hi tutan ah a tam in a tam tuk. Election ko nih hin cu bantuk zohdawhlo lungput le cawlcanghnak cu a chuahpi khun,” tiin Ohio’s State Secretary Republican Frank LaRose nih a chim.

“ ‘Vote rel lo caan ah vote an rel, asiloah rel caan vial ah an rel lo,’ tiin duhlonak a langhtertu minung pakhat te hmanh ka thei hraw hna lo. Cucaah, dehhlennak pakhat hmanh a um lo,” tiin Minnesota’s State Secretary Democrat Steve Simon nih a chim.

“Kansas ah hin cun vote dehhlennak kong thawngpang a leng lo. Thihphaihnak, ningcanglo thil a umnak, asiloah vote kongah thil buai a um, timi thawngpang kan thei lo. A tu dirhmun tiang phan kho dingin kan election tluangtein a kalmi kongah kan i lunghmuih ngaingai,” tiin Kansas’ State Secretary Republican Scott Schwab i a aiawhbiachimtunu nih a chim.

“Vote dehhlennak kongah tehte, asiloah phungbuar in vote pekmi hna a um el maw,” tiin Monday le Tuesday ah khan The New York Times nih top election officials pawl an office phone in an chonh hna i an hal hna. US chungum state 50 lakah 45 nih direction in NY Times cu an leh colh hna. A tangmi state 4 ah cun an state secretary cio sinin, asiloah an officials pawl sinin thawngpang an laak i, nihin tiangah cun vote dehhlen a tonnak a um lo, ti a si.

Texas i officials belte nih lehnak an tuah rih lo. “Thil buaibai tlawmte cu a um ko nain, kan election hnursuang kho thil cu a si lem lo,” tiin a Texas chung i a nganbik county a si mi Harris County ah a ummi top election officials nih an chim. “Vote dehhlennak thawngpang a pe kho mi paoh cu $ 1 million bak laksawng chuah nan si lai,” tiin Texas ah lawlawse governor a tuanmi Republican Dan Patick nih Tuesday ah thawng a thanh.

Election kip ah a um tawnmi buainak tete cu a um ve ko. Bianabiaah, voihnih thlak in vote a thlami an um, cun sehthilri ai ningcanlo hna a um, kanaan (math) kongah an i palhmi hmetete hna an um ve ko. State 50 ah a ummi officials vialte nih vote kong hi anmah tein zohthannak an tuah – cucu election a phichuak namhnehnak dingah tuah tawnmi a si.

The Times nih thawngthanhnak a tuahmi nih hin Trump le state tampi ah a ummi a Republican mipi pawl nih kan ram voting system thlen dingin thazaang an chuahnak vialte a phozarpiak hna.

Dehhlennak a ummi hi a hrawm in bongh dingin nan kan tanpi duh ve lo, tiin anmah Party minung lila an i congoih cang hna. Biden nih Trump a lonhnak Georgia zongah senator dirhmun hmuh than khawhnak caantha ai ngeihmi Republican senators pahnih, Kelly Loeffler le David Perdue, nih Georgia’s state secretary Republican Brad Raffensperger a rian in i phuak dingin an au hnawh. “Hi state secretary nih hin tutan election ah piangraangtein lung i hmuhnak (transparency) le dingfeltein cawlcanghnak a kalpi kho lo,” tiin an mawhchiat.

Vote an tawlrelning ai ningcan lo, nan system a hman lo ruangah ka sung, tiin Trump nih a ti nak Pennsylvania i county 7 ah Monday in khan Trump a campaign nih tazacuainak an tuah. A ngaingai ti ah cun, Trump nih a teinak a dang a taangmi county zongah cun cu system thiam cu an hmanmi a si. Michigan zongah tazacuainak kan tuah rih lai, tiah Trump a campaign nih an chim.

Nevada le Pennsylvania ah thil dawhcah lo an tuah, tiin lih rumro cun Twitter ah Trump nih ca a tial. Georgia ah hin cun ka tei hrim awk a si. Wisconsin ah cun tlawmte caan an ngandeuh rih a hau lai, tiin a chim. Asinain, a ruang zeihmanh a langhter fawn lo.

“Thatein zohfel an si ko caah, ningcanglo in vote pek, timi hi a har ngaingai ding thila si. Tutan election ah hin cun minung hi khat le khat i naih lo in, ralringtein kan tawlrel hna caah, vote kong i dehhlennak tuah hi a si kho lo mi thil bantuk a si,” tiin Rhode Island’s state secretary Democrat Nellie Gorbea nih a chim.

2016 lio te in khan Trump nih vote dehlennak kong ai riitpi cang i, pupolar vote in 3 million tluk a sunghmi kongah vote dehhlennak an tuah, tiin sual a rak kawl bal hna. Thimnak an tuah hnu ah, vote dehhlennak ralventu Commission phu pakhat a dirh colh. A thlite in ngiatthlainak an i tuah sek ko nain pakhat hmanh an hmu lo.

Tutan i Trump campaign nih election system an dohmi hi cu US election kipah a um pah tawnmi a hmetete palhnak kha lianpi in langhter an i timh caah a si. Bianabiaah, Ohio ah cun, kan state pumpi i election tuah a si tikah thil ai ningcanglo mi zapeikuarkhat hrawng tal hi cu a um hmang a si. Asinain, ciammaamtein dehlennak tuah hi cu a um bal hraw lo, tiah LaRose nih a chim.

“A liamcia caan ah khan, Citizen a si rih lo nain vote a thlami an um, tiin khuachung sihni le attorney general sinah thawng ka thanh bal. Cu hna zong cu minung 20 hrawng lawng an si. A za an tling bal lo. Hi dehhlennak hi cu a zualhma ko cang, tiin hmuhmi a um bal lo. Vote kongah thil buai a si mi paoh cu biataktein kan zuanhnawh zungzal,” tiin a chim.

Minnesota ah a ummi Duluth khua pawng khuate pakhat ah relciami vote voihnih in an rel sual caah, a thar in rel than dingin state secretary Simon nih nawl a pek hna.

Georgia ko ah hin vote relnak kongah an buai khun. Transparency a um lo, tiin Trump campaign le Republican senator 2 nih duhlonak an langhter. Asinain, state secretary Republican Raffensperger nih cun ‘nihchuak in” tiin a tipiak salam hna.

“Suimilam pakhat dan in kan relmi a zat a phichuak a siningtein kan thanh ko. Nan relmi vote paoh hi vote relnak khaan chungah a ummi members vialte pakhat hmanh bau lo in nan zohter hna lai, tiin nifatinte, asiloah nikhat ah voihnih tiin Press pawl bia kan ronh hna. Cucaah cu, tutan tazacuainak hi cu nihchuak a si,” tiin a chim.

Ai palhmi tete cu a um ve men ko lai. Asinain, election a phichuak a hleng kho cu an si theng ti lai lo, tiin a chim. Dehhlennak asiloah ningcanglo in thil ti nak hmuh a si lo ruangah le, cun thatein thimnak tuah a si cang ko, tiin Republican election officials lila nih an chim mi nih Trump i tazacuainak a kalpimi hi santlai lo bantuk an siter cang.

Detroit, Michigan, vote rel lio cuantu dingah rian an fialmi pawl vote relnak hmun ah luh an senh hna lo, tiin Trump campaign nih tazacuainak an tuah. Asinain, khuachung election officials pawl nih an chim ve ningah, kaphnih campaign minung pawl a chungah kan luhter veve ko hna, ti a si.

Kan hnung zarh ah khan, vote rel lio zohfetu hna kong chirhchan in vote rel mak dingin Trump campaign nih nawlnak an tuah ko nain, ‘nan bia a fiang lo. Biachokvai men a si’ tiin biaceihbawi nih an bia a hnonpiak hna. Trump le a Republican hawile pawl an hlawhtlinnak state pawl vial ah cun vote kong i dehhlennak thawngpang hi a thang lo. Trump a minung pawl hmurka hrim ah a leng lo. Source: Chelsea Bawi (Global Rawn Chin Media)