Falam Peng Dokṭhek Khua Pawng Ah Kahdohnak Chuak, SAC Ralkap Nih Chuncung Khua An Khangh! Chin ramkulh Falam peng Dokṭhek khua pawng ah nihin July 14 zinglei in zaan Sml 7 tiang SAC ralkap le CJDC Special Force kar kahdohnak a chuak, tiah theih a si. Cun CJDC Special Force lei in minung 2 cu SAC ralkap bomb hmanh mi an i lamh sual caah an hngawng le an phei ah hliam hmete an tuar.

Falam-Hakha kar ah ni 7 chung kahdohnak a chuak cang i, SAC ralkap 50 hrawng an thi cang. CJDC Special Force in ralkap pakhat a nunak a liam. Nihin July 14 ṭhiam ah SAC ralkap nih Hakha peng Chuncung khua cu an luhhnawh i inn 6 an khangh tiah theih asi. Mah vial hi kan theih mi cu asi adang relkhawh asi atang leiah relchap.

Thawngdang Khin-U Ah SAC Ralkap Bomb Puahhnawh An Si I, Ralkap 15 An Thi! Sagaing ramṭhen Khin-U peng ah SAC ralkap mawṭaw hna cu tualchung PDF nih nihin July 14 zing Sml 4 ah bomb an puahhnawh hna i, SAC ralkap 15 an thi tiah theih asi. Bomb puahhnawh an ton nak hmun cu Innpat khua pawng ah voikhat, Yee-U in an kir lei Myindaung-Thayatpinsuh lam ah voi 2, Kaanpat khua pawng ah voikhat tiin bomb voili puahhnawh an si i, ralkap 15 an thih lengah midang 30 hrawng hliam an tuar tiah Khin-U thawnglatu pakhat nih a chim.

Nihin ah Siizung in SAC ralkap mawṭaw hme 3, mawṭaw ngan 1 le cycle 5 in SAC ralkap hna cu Khin-U lei ah an ra. Pyosawtee hna cu SAC ralkap 20 he an i bawm i bomb zohfelnak an tuah. Cu lio ah cun bomb puahhnawh an si tiah a chim. Bomb a puahhnawhtu hna cu KSO le tangrual phu DUGF/Wolf/ FAF/ Northern Tiger Group tel in Ldf phu 14 an i bawm, tiah KSO nih an thanh.

Tanintharyi Peng Ah Tiva Ti A Lianh Caah Sianginn 2 An Khar! Tanintharyi ramṭhen, Myat pengkomh ah tulio hrawng cu ruah fak ngai in a sur caah tiva ti an ṭhang i SAC nih an on mi sianginn lak ah 2 cu an khar chung, tiah theih a si. July 13 zinglei in tiva cu feet 13 leng a ṭhang i, zaan ah cun feet 14 tiang a phan, tiah tualchung mi nih an chim.

Tanintharyi i khausa mi pakhat nih cun Nizaan tiang ti a ṭhang peng i nihin ah cun feet 15 le 10 inches tiang a phanh cang caah sianginn an khar chung tiah a chim. Pawah(ပဝ) khuakomh, Pawah-Thayakone khua le Thayakone in Tamoukchaung khua kalnak lam cu ti nih ft’ 2 tiang a phum caah sianginn 2 cu June 13 in khar a si, tiah pengchung fimcawnnak zung nih an thanh.