Chin Ramkulh Uktu Ding Ah “Pu Terrance San Mawi Nikhuai” An Thim. Kawl ralkap nih hramhram in rampi uknak a laak ni thawk in a ni 2nak ah Chin ramkulh uktu thar Chin state administrative council chairman ding cu Dr. Ni Khuai fapa Pu Terrance San Mawi nih a țuan lai tiah ralkap nih a thanh.

Amah hi Falam peng Lumte khuami a si tiah kan theih. Kawl ralkap nih hramhram in rampi minung a uk chung poh cu Chin ramkulh zong ah zapi thim lomi Pu Terrance San Mawi Nikhuai nih a kan uk rih lai. Source:Rawn Chin Post

The Hakha Times: Hakha inn kangh ningcang a fiang cang. Hakha ah Pu Hrang Cung le Pu No Hnin inn a kaang, minung 6 an thi. 2021 February 2, zinglei 5:40 tluk ah Hakha Dillo Sang um, Zokhua khuami Pu Hrang Cung le Thantlang Peng Hriphi khuami, Hakha um, Pu No Hnin inn a kaang, Pu Hrang Cung fale 5 le a nau fa 1 an thi.

Hi kong ah inn ngeitu Pu Hrang Cung nih, “Voidang tawn ahcun zinglei suimilaam 3:00 ah hin ka tho i rawl ka chuan dih tawn. Zahan cun ka mitkuh a thaw tuk i kaa hlau kho lo. Kan uicote a bao tuk i kaa hlau. Ka vun i hlauh ahcun meikhu kaa haak cang. Tho zokzok u, tiah ka au i kan nu cu a tho manh. Thlalangawng ka bauh i ka fale pahnih cu ka hlonh (leng ah chuah) manh hna. Kan nu he kan zaam manh ceo khi a si. Ka naufa Samuel zong aa tel. Ka fapa Amon Bawi Chit Htoo hi kan hnuleite ah motor nih a pah i a ke kiah ca ah a zaam manh ve lo. Zeitin mei kangh aa thok ning zong ka fiang kholo,” tiah The Hakha Times ah a chim.

Hi kong ah Hakha Meithat Zung lutlai Pu Thian Nuam Maung nih, “Inn kangh aa thok ning kan hlat lengmang tik ah an inn hi dot thum a si. A dot hnihnak ah hin electric in rawl an chuan tawn. Cucaah, electric plug in aa thok lai ti cu a fiang ko. Cun, thiri a ciam mi man hi kan tuak khawhtawk ah tangka in Ks. 264,000 a si,” tiah The Hakha Times ah a chim.

Innpa Pu No Hnin inn pakhat zong a ciam ve nain innhlaang hi Lo ah a riah kar a si ca ah annih chung cu an luat. Pu No Hnin inn hi inn hnih a si i inn khat cu a ciam dih. Anmah chungkhar umnak inn tu cu a him. A thi mi hna hi kan theih tawk ah; Par Tha Hlei, Ngun Sui Par, Amon Bawi Chit Htoo, Ngun Cin Hniang, Ngun Tha Len, le Samuel an si, tiah kan theih.

Biakilh: Update news kan thanh than te lai.

_____

Copyright © Chin World News Evening