Chin Ramkulh Paletwa Ah SAC Ralkap le AA Kahdohnak A Zual! Chin ramkulh Paletwa peng ah SAC ralkap le AA hna cu August 1 in 3 tiah pehtlai in an i kap tiah theih a si. Paletwa khua thlanglei Kaladan tiva nichuah lei Na tlang lonh lam le Namaṭa khua pawng ah kahdohnak a chuak i, Battalion 289 nih kahdohnak hmunhma cu hriamngan in an kah, tiah Paletwa ummi pakhat nih a chim. Kahdohnak ruangah SAC ralkap nih Kaladan tiva thluan a kalmi vokkuanglawng hna cu chekhlatnak an tuah hna tiah theih asi.

August 2 ah Ṭungmawa khua siangsangrun ah sianginn a kaimi hna cu vokkuanglawng i cit in an ṭin lei ah SAC ralkap nih an kah hna caah kum 12 hrawng tang nga kaimi siangngakchia pa pahnih cu a hmun ah an thi. Siangngakchia pathum zong hliamhma an pu. Paletwa peng ah SAC ralkap nih ahlan lio tein ti lam le tlang lam an rak phih caah eidin phorhnak a har ngai. Atu lio zong ah kahdohnak a zual i, Paletwa khua mi hna cu eidin le a dangdang thilri an har ngai, tiah theih a si.

Thawngdang NUG nih Australia ram he pehtlaihnak palai zung a awn. NUG nih Australia ram he pehtlainak palai zung cu August 3 ah a awn i Australia ram Hluttaw palai pawl ramdang lei zung rianngeitu pawl an kai kho tiah NUG Australia he pehtlainak zung nih a thanh. NUG palai zung awnnak ah NUG ramdang lei Minister Daw Zin Ma Aung cakuat le biaeihnak lei Minister U Thein U cakuat relnak an ngei i nuhrin covo lei Deputy Minister Khun Va Han Thang Mr. Peter Khalil MP (Labor Party, Senator the Hon David Fawcett (Liberal Party) Senator Jordon Steele John (the Green party) hna biachimnak CRPH/NUG Support Group (Australia) palai pawl le tlangcung Council pawl nih biachimnak an ngeih.

Myanmar ram palai Professor Dr. S. Tha Mit, Mr. Christopher Lamb (President of Australia Myanmar Institute), Min Maw Kun hna nih dothlennak he pehtlaih in an ruahnak pawl ceihhmainak an ngei i Australia he pehtlai in NUG palai Dr. Htun Shwe Aung nih lunglawmh biachimnak a ngeih.

Cu palai zung awnnak ah Australia ram i a tha ṭhawngmi The Australia Greens party nih NUG cu Myanmar ram i phunglut cozah a si ko tiah a cohlan lengah Australia ram adang party pawl zong nih cohlannak an thanh ve. Zung awnnak ah Australia ramdang lei zung riansang tlaimi pawl le New Zealand le Australia ram pehtlaihnak Second High Commissioner zong a kai kho tiah theih a si.