Breaking News: Chin Miphun Palik 2 Hriamthil He Myine PDF Sin Ah CDM An Tuah. Chin Miphun Palik 2 Hriamthil He Myine PDF Sin Ah CDM An Tuah. Magway ramṭhen, Myine peng KaiṬawMah palik sakhan in palik 2 cu nizaan July 8, zinglei ah Myine PDF sinah CDM an tuah tiah theih a si. CDM cawlcanghnak a tuahtu hna cu Private number lah/ 261731 Pasang le lah/284488 Lu Taw an si. Meithal pakhat veve leng ah kuanfang 90 zong an i put tiah Myine PDF in Bu Latya nih a chim.

Nizaan June 8, zinglei suimilam 9:45 hrawngah CDM an tuah hi a si. An pahnih in KaiṬawMah palik sakhan in an si. An pahnih in BA 92 mei thal pakhat veve an i put caah minung pakhat ah sing 50 laksawng pek an si tiah achim. CDM cawlcanghnak atuahtu ralkap cu Pakokko peng komh KaiṬawMah palik sakhan ah rian an ṭuannak ni 4 lawng a si rih, an pahnih in Chin miphun an si caah a tu ah cun Chin ramkulh lei ah kalter an si cang tiah theih a si. CDM cawlcanghnak a tuahtu palik 2 telh in Myine PDF sinah CDM cawlcanghnak a tuahtu ralkap dihlak 9 an si cang. Cu chung in minung 3 nih an hriamthil he CDM cawlcanghnak an tuah tiah Bu Latya nih a chim.

Thawngdang Karenni Ralkap Nih SAC ralkap Sakhan An Luhhnawh 40 Nak Tam An Kah Thah Hna. Shan ramkulh thlanglei Phekone lei peng le Kayah(Karenni) ramkulh Loikaw le Demohso peng um SAC ralkap sakhan hna cu Karenni ralkap phu hna nih July 4 le 6 hna ah an kah hna i SAC ralkap 49 leng an thi. Mizapi vengtu ralkap 11 an nunnak a liam ve tiah KNDF nih nihin July 8 ah cathanh an chuah.

July 4 ah Pekone peng um LoiPaTha Kone sakhan le ShwePyiAye Kone sakhan cu Karenni Army KA, KNDF, Phekone PDF, MoeBe PDF, hna SSRY hna i bawm in an kahdoh hna caah SAC ralkap 40 leng an thi. SAC ralkap hna nih hriamngan tamtuk an hman ruang le, bawmtu tampi an rak thlah i an kan kulh dih i an kan kah caah kan ralkap 11 an nunnak a liam tiah an langhter.

July 6 zinglei Suimilam 6:00 ah Loikaw peng, LawPyiTa khua kam um SAC ralkap sakhan cu KA le KNDF nih an kah hna i SAC ralkap lei in Captain pakhat a thi. Cu hnu ah SAC ralkap nih Helicopter in voi 11, Jet vanlawng in voi 9 tiin an kan kah caah zing Suimilam 11:00 hrawng ah hnu kan tolh than tiah KNDF nih an langhter.

Cu SAC ralkap Tilawng sakhan kahdoh lio ah Loikaw peng, Meng 4, No. 1 sakhan in bawmh ding a ra mi SAC ralkap hna cu SuLaSe  Law KaHtu khua karlak ah KNDF nih kan kah hna i SAC ralkap 5 an thi, 4 hliam an tuar. Cun SAC ralkap hna nih SuLaSe khuami pakhat cu a ruang um lo in an kah thah.

July 6 chun ah NgweTaung hmunhma um Khah- Mah- Yiah 427 kam um SAC ralkap hna security an hngah nak cu KNDF nih kan kah i SAC ralkap 3 an thi hliam tuar mi zong an um. Baw- La- Khe – Yuathit lampi PonChuang hlei kam SAC ralkap hna gate cu KNDF nih kan kah hna i minute 30 hrawng kaphnih kahdohnak fak a chuak i SAC ralkap lei a thimi le a hliammi an um tiah KNDF nih an thanh.