Breaking News: CDF-Phufonh Hna Le SAC Ralkap Kahdohnak Ah SAC Ralkap 44 An Thi I Minung 30 Hliam An Tuar!

Myanmar News

CDF-Phufonh Hna Le SAC Ralkap Kahdohnak Ah SAC Ralkap 44 An Thi I Minung 30 Hliam An Tuar! July thla ni 30, 2022 ah Monywa lei  Bataillon umhmun khuarmi Tamu in a rak kai mi SAC ralkap pawl cu Kalay in khampat kar mengtung 55 pawng ah CDF-Tonzaang PDF-Zaju le PDF -Kalay Ṭangrual phu hna nih bomb an puahhnawh hna i kaphnih kar kahdohnak a chuak. Cu kahdohnak ah cun SAC ralkap 44 an thi i munung 30 hliam an tuar, tiah CDF – Tonzaang headquarters nih an thanh.

May be an image of 10 people and outdoors

Thawngdang Nizaan July 31 ah SAC nih an tuahmi National Security Council (NSC) tonpumhnak ah NLD chan Vice President Pu Herny Van Thio a kai kho lo, tiah SAC thawngzamhnak Myawaddy (MWD) nih nihin August 1 ah a langhter. “Vice President U Henry Van Thio cu damlo nak ruang ah National Security Council tonpumhnak ah a kai kho lo,” tiah MWD nih a langhter.

2021 New Year Message from Vice-President U Henry Van Thio | Myanmar Digital News

2020 thimnak ah Pu Henry Van Thio cu Thantlang peng, Amyotha Hluttaw ah aa cuh tthan i teinak a rak hmu. Asinain, SAC nih February 2021 ah uknak an lak thawk in Pu Henry Van Thio hi mipi hmai ah le Kawlram chung media cahmai ah a cuang ti lo. Pu Henry Van Thio a dirhmun le a sining theih khawh awkah chungkhar naihniam hna cu The Chin Journal nih caan saupi kan hal hna nain atu tiang ah thil sining fiang in a kan chim kho lo. Nizaan ah SAC nih a tuahmi NSC tonpumhnak ah ralkap uknak thla 6 chung kan chap, tiah biachahnak an tuah. Credit: The Chin Journal

Thawngpang dang: Kalay-Tamu Lampi Ah SAC Ralkap Bomb Puahhnawh An Ton Caah Ralkap 15 An Thi: Kalaymyo in Tamu lei ah a kalmi SAC ralkap motor cu July 30 ah PDF-Kalay nih Kalay-Tamu lampi ah voithum bomb an puahhnawh hna i, ralkap 15 an thi, tiah theih a si. Tamu lei ah a kalmi SAC ralkap motor 4 le motor ngan (ke 12 ngei) pakhat cu PDF-Kalay nih meng 56 pawng ah voikhat, Naykyawlay pawng ah voikhat bomb kan puah hna caah ralkap 10 an thi. An motor 3 a rawk, tiah PDF-Kalay nih cathanh an chuah.

Cu bomb puahnak ah a thimi ralkap hna ruak cu Kalay in rak laak ding ah a rami motor 2 cu bomb kan puahhnawh ṭhan hna i, ralkap 5 an thih lengah tam ngai hliamhma an pu, tiah an langhter. SAC ralkap a thimi le hliam pumi hna cu motor ngan (ke 12 ngei) nih a phorh hna i, Kalay lei ah a kalpi hna. A taangmi ralkap pawl tu cu Tamu lei ah an lan, tiah theih a si.

SAC ralkap nih mengtung 56 Rose pangpar dum pawng ah tualchung mi 3 le lamkam rawldawr ah mi cheukhat an tlaih hna, tiah PDF-Kalay nih an langhter. Tamu Ah Pyusawhti Pa Nih Sualnak Ngei Lo Mi Pa Pakhat A Thah!: Tamu khuapi No.12 sang Kyusan kuva dawr pawng ah tualchung mi Myint Maung, kum 40 cu Pyusawhti pa nih nizan July 31 chun sml 12:00 hrawng ah a tlaih i, Pahe tiva hlei pawng ah meithal in a kah thah, tiah tualchung mi hna nih an chim.

Myiny Maung cu kutzung thiammi a si caah inn sak in aa cawmmi a si. A ruak cu a thahnak hmun ah a um ko. Zei ruangah dah a thah ti cu hngalh a si rih lo. A luancia July 5 lio zong ahkhan India rammi pahnih cu Pyusawhti nih Tamu khuachung ah zohchia ngai in an rak thah hna i, an ruak zong an rak cik dih hna. Cu India rammi pahnih thahnak kong ah a thattu hna cu zeitin dah dan an tat hna ti zong theih a si lo i, SAC ralkap le India ram karlak ah zeitin dah remnak an tuah ti zong theih a si ti lo.

Leave a Reply